რეგიონები

რეგიონებში ადამინებს სარისკო სამუშაოების ალტერნატივა არ აქვთ - მიხეილ კორძაია

„დამსაქმებელთა ასოციაციის“ ვიცე-პრეზიდენტის, მიხეილ კორძახიას განცხადებით, პრობლემა ისაა, რომ რეგიონებში სოციალურ-ეკონომიკური მდგომარეობიდან გამომდინარე, ადამინებს სარისკო სამუშაოების ალტერნატივა არ აქვთ.

მისვე თქმით, ერთი წლის განმავლობაში კონტროლის მექანიზმები არსებობდა, თუმცა ტრაგიკული შემთხვევები ყოველწლიურად გვაქვს.

“ერთი წლის განმავლობაში კონტროლის მექანიზმები არსებობდა და სახელმწიფო უწყებების მიერ შემოწმება არაერთხელ მოხდა, მაგრამ ფაქტია, ტრაგიკული შემთხვევები რამდენიმე სფეროში, გამოკვეთილ კომპანიებში ყოველწლიურად გვაქვს”,- განაცხადა კორძაიამ.

მისი განცხადებით, პრობლემას გლობალურად უნდა შეხედონ.

„ანუ, რეალურად, ბრალეულობის საკითხის მიუხედავად, ამ ნაწილში მოცემულობა არ გვეცვლება. ამიტომ, ამ საკითხს გლობალურად უნდა შევხედოთ. სავარაუდოდ, ყველაზე მთავარი პრობლემა ისაა, რომ ამ რეგიონებში, სოციალურ–ეკონომიკური მდგომარეობიდან გამომდინარე, ადამიანები სარისკო სამუშაოებზე ისევ, ფაქტობრივად, უბედური შემთხვევის მეორე დღიდანვე მიდიან, რადგან ალტერნატივა არ აქვთ“, – განაცხადა კორძახიამ.

კორძაია საწარმოო პროცესში უბედური შემთხვევების თავიდან ასაცილებლად ალტერნატიული გზების მოძიებაზე საუბრობს.

„ერთობლივად უნდა მოხდეს რისკების განსაზღვრა. ამა თუ იმ მხარის ძალისხმევიდან გამომდინარე, თუ უბედური შეთხვევების თავიდან აცილება შესაძლებელია, რა თქმა უნდა, კანონის აღსრულების მექანიზმი უნდა გამოვიყენოთ, მაგრამ თუ ეს იდეაშივე შეუძლებელია, მაშინ ამა თუ იმ სამუშაოებთან დაკავშირებით სხვა ალტერნატივები უნდა შევქმნათ“, – ამბობს ის.

კორძაიას განცხადებით, უბედური შემთხვევების სტატისტიკა საგანგაშოა და პრობლემის გადაჭრას კომპლექსური მიდგომა სჭირდება.

შეგახსენებთ, რომ 5 აპრილს ტყიბულის მაღაროში უბედური შემთხვევის შედეგად 6 ადამიანი დაიღუპა, 3 კი დაშავდა. 6 აპრილი საქართველოში გლოვის დღედ გამოცხადდა.