რეგიონები

რამდენიმე დღის წინ ფოთში აფეთქების შედეგად დაშავებული ახალგაზრდა მამაკაცი გარდაიცვალა

ფოთში, 5 სექტემბერს მომხდარი აფეთქებისას დაშავებული ირაკლი ქუხილავა ზუგდიდის რეფერალურ ჰოსპიტალში გარდაიცვალა.

ჰოსპიტლის კლინიკურმა დირექტორის, სულხან ორჟონიას ინფორმაციით, მამაკაცის ტრავმა სიცოცხლისთვის შეუთავსებელი აღმოჩნდა.

მისივე თქმით, ცხედარი გადასვენებულია ექსპერტიზის ბიუროში.

5 სექტემბერს, გამთენიისას ფოთში, ნაბადის უბანში აფეთქება მოხდა, რომლის შედეგად აფხაზეთიდან დევნილი რომან სიჭინავა გარდაიცვალა.

სამი დაშავებული, 33 წლის გოგა სიგუა, 29 წლის ირაკლი ქუხილავა და 16 წლის ომო ცუცქირიძე კი მძიმე მდგომარეობაში კლინიკაში იყვნენ მოთავსებული.

წინასწარი ინფორმაციით, ხელყუმბარა მაგიდასთან მსხდომი ახალგაზრდებიდან ერთ-ერთს ჰქონდა, თუმცა ვინ ან რატომ მოიყვანა ის საბრძოლო მოქმედებაში ჯერჯერობით უცნობია. ერთ-ერთი ვერსიით, ახალგაზრდები ნასვამები იყვნენ და მათ შორის ურთიერთშელაპარაკება მოხდა, რასაც ერთ-ერთი დაშავებულის მხრიდან ხელყუმბარის საბრძოლო მოქმედებაში მოყვანა მოჰყვა.