რეგიონები

რაჭაში მოსახლეობა „ონის კასკადის“ მშენებლობას აპროტესტებს

მოძრაობამ „არა ონის კასკადს“, რაჭის მოსახლეობასთან ერთად, „ონის კასკადის“ მშენებლობის წინააღმდეგ მშვიდობიანი აქცია გამართა.

აქციის მონაწილეები ითხოვენ სახელმწიფო უწყებებმა კომპანია „ფერას“ პროექტის განხორციელების ნებართვა არ მისცეს.

როგორც მოძრაობის წევრები აცხადებენ, მათ კონსულტაცია გაიარეს გეოლოგებთან და სეისმოლოგებთან და მათი თქმით, არც ერთი დასკვნა პროექტის უსაფრთხოებაზე არ მეტყველებს.

,,ექსპერტებმა განაცხადეს, რომ ონის კასკადის პროექტში არ არის მოცემული არც ერთი დასკვნა, რომელიც დაადასტურებს პროექტის უსაფრთხოებას. მათი მტკიცებით, განხორციელების შემთხვევაში, პროექტი გამოიწვევს ეკოლოგიურ კატასტროფას და საფრთხეს შეუქმნის ადგილობრივ მოსახლეობას. ეს მოსაზრება ექსპერტებმა გააჟღერეს სხვადსხვა სატელევიზიო ეთერის მეშვეობითაც“,- ამბობენ აქციის მონაწილეები.

მათივე თქმით, ონის გამგეობაში პროექტის საჯარო განხილვის შესახებ საზოგადოებას ინფორმაცია არ ჰქონდა და ადგილობრივმა ამის შესახებ არასამთავრობო ორგანიზაციის წარმომადგენლისგან წინა დღეს გაიგეს.

მოძრაობის წევრებმა მშენებლობის საწინააღმდეგოდ ათასობით ხელმოწერილი განცხადება შესაბამის უწყებებში უკვე შეიტანეს.

აქციას სვანეთის მოსახლეობაც შეუერთდა.

ცირა გუგრნიძე