მოზაიკა

ქართველ ბორჯღალოსნებს რაგბის ელიტაში არ უშვებენ - გარდიანი

ბრიტანული გამოცემა გარდიანი უელსის ნაკრებთან 18 ნოემბრის შეხვედრის წინ ქართველ ბორჯღალოსნებზე ვრცელ სტატიას აქვეყნებს.

გამოცემის შეფასებით, საქართველოს სარაგბო ნაკრები ზედმეტად კარგია მეორე რანგის ნაკრებებისთვის, თუმცა ე.წ. სარაგბო ელიტაში, იმავე ექვსი ერის ტურნირზე [ყოველწლიური ჩემპიონატია, სადაც ევროპის 6 უძლიერესი სარაგბო ნაკრები: ინგლისი, ირლანდია, უელსი, იტალია, საფრანგეთი და შოტლანდია მონაწილეობენ] მოსახვედრი კარი ბორჯრალოსნებისთვის კვლავაც დაკეტილია.

სტატიის ავტორის თქმით, საქართველოს ნაკრებმა 53 წლის ახალზელანდიელი მწვრთნელის, მილტონ ჰეიგის ხელმძღვანელობით მნიშვნელოვან პროგრესს მიაღწია. თვითონ მწვრთნელი შიშობს, რომ ეს წარმატება შეჩერდება, რადგან წინსვლის პერსპექტივა არ ჩანს.

„ბოლო ორი წლის განმავლობაში ჩვენ დავამტკიცეთ, რომ ევროპის თასისთვის უკვე გავიზარდეთ. პატივს ვცემთ მეტოქეებს, მაგრამ ჩვენ უკვე მივაღწიეთ იმ ეტაპს, როდესაც კანადასთან 54 ქულა დავაგროვეთ. მეტიც, მე უკმაყოფილოც კი ვარ, რადგან ისე ვერ ვითამაშეთ, როგორც შეგვიძლია. ჩვენ ვაკეთებთ ყველაფერს, რაც მოგვეთხოვება და რასაც ჩვენგან ელოდებიან, ამიტომ დიდი სიამოვნებით გავმართავდი კიდევ ერთ მატჩს პირველი რანგის გუნდთან, უელსის შემდეგ, რათა საკუთარი თავი გამოვცადოთ. სხვაგვარად როგორ განვვითარდებით?“, - აღნიშნავს ჰეიგი „გარდიანთან“.

გამოცემა წერს, რომ მსგავს სიტუაციაში 2000 წელს იტალიის სარაგბო ნაკრები იმყოფებოდა. მაშინ 5 ერის თასი ექვსი ერის თასად გადააკეთეს. ასევე მოხდა არგენტინის შემთხვევაში, რომელიც 2012 წელს ჩაერთო რაგბის ჩემპიონატში [ტურნირში მონაწილეობს სამხრეთ ნახევარსფეროს 4 უძლიერესი სარაგნო ნაკრები].

ჰეიგი იმედოვნებს, რომ ბორჯღალოსნები შეუერთდებიან 6 ერის გათამაშებას.

„ვფიქრობ, გვაქვს იმედი, რომ მოვხდებით 6 ერის გათამაშებაში. იყო ამაზე საუბრები და რაგბის კავშირის ახალმა ხელმძღვანელმა სტეფენ ბრაუნმა თქვა, რომ დროა, შევხედოთ საქართველოს, რომელიც ექვს ერს უახლოვდება. სწორედ ამიტომ არის მნიშვნელოვანი, როგორ ვითამაშებთ უელსისა და იტალიის წინააღმდეგ“, - ამბობს ჰეიგი.

„გარდიანის“ ინფორმაციით, საქართველოს მოხვედრას ექვსი ერის გათამაშებაში მხარს უჭერს კლუბ მონპელიეს მფლობელი მოჰედ ალტრადი, რომლიც საქართველოში 20 წლამდელთა სარაგბო ნაკრებს ეხმარებოდა.

ბორჯღალოსნების მწვრთნელი ასევე აღნიშნავს ქართული რაგბის ბოლოდროინდელ მიღწევებს. ის ყურადღებას ამახვილებს, რომ გაზრდილია დაინტერესება სპორტის ამ სახეობის მიმართ, მშობლებს სულ უფრო მეტი ბავშვი შეჰყავს რაგბიზე. ჰეიგის თქმით, პირველად, როცა ის საქართველოში ჩამოვიდა, ქვეყანაში მხოლოდ 2 თანამედროვე სტანდარტების შესაბამისი რაგბის მოედანი იყო, ახლა კი მათი რაოდენობა 16-მდე გაიზარდა. ბორჯღალოსნებით სულ უფრო მეტი სპონსორი ინტერესდება. ჰეიგის ინფორმაციით, უელსთან თამაშის ტელევიზიის პირდაპირ ეთერში ჩვენების უფლების მოპოვებას 5 კომპანია ცდილობდა.

მწვრთნელის შეფასებით, 2019 წლის მსოფლიო ჩემპიონატისთვის საქართველოს სარაგბო ნაკრები საკმაოდ კონკურენტუნარიანი იქნება.

„ბევრად უკეთესები ვართ ვიდრე 2015 წელს“, - ამბობს ჰეიგი.

ახალზელანდიელის თქმით, უელსთან თამაშში ბორჯღალოსნები გამარჯვებისთვის იბრძოლებენ.

„მე ვუთხარი ბიჭებს, რატომ არ უნდა გავიმარჯვოთ? ჩვენ ბევრს ვემზადებოდით და რატომაც არ უნდა დავამწუხროთ უელსი? თუ შენ თვითონ არ გჯერა, მაშინ აგებ. დღეს ბიჭებს მოგების განწყობა აქვთ. ჩვენ თამაში შეგვიძლია და ეს რაგბის სამყაროსაც უნდა დავუმტკიცოთ“ – ამბობს საქართველოს ნაკრების მთავარი მწვრთნელი

ანა მებურიშვილი