მოზაიკა

ქართული სპორტის სტატისტიკის ახალი ვებ-პორტალის პრეზენტაცია გაიმართა

სპორტკომპლექსში „ახალი თბილისი“, სპორტისა და ახალგაზრდობის საქმეთა სამინისტროს იდეითა და მხარდაჭერით განხორციელებული და სპორტულ ჟურნალისტთა ასოციაციის ორგანიზებით მომზადებული ქართული სპორტის სტატისტიკის ვებ-პორტალის - www.sportstat.gov.ge პრეზენტაცია გაიმართა.

სპორტისა და ახალგაზრდობის საქმეთა სამინისტროს ინფორმაციით, პრეზენტაციას, რომელიც სპორტკომპლექსის სტადიონთან მდებარე ახალ სასტუმროში ჩატარდა, სპორტისა და ახალგაზრდობის საქმეთა მინისტრი ტარიელ ხეჩიკაშვილი, სპორტული ორგანიზაციებისა და ფედერაციების ხელმძღვანელები, სამინისტროს წარმომადგენლები და ასევე მოწვეული სტუმრები და ჟურნალისტები ესწრებოდნენ.

სპორტული სტატისტიკის ახალი პორტალის პრეზენტაცია პროექტის ავტორებმა, სპორტისა და ახალგაზრდობის საქმეთა სამინისტროს სპორტის კვლევისა და ანალიზის სამმართველოს უფროსმა, ვასილ ლიპარტელიანმა და პრესსამსახურის თანამშრომელმა, ლაშა გოდუაძემ წარმოადგინეს.

როგორც სამინისტროში აცხადებენ, უწყება 2015 წლიდან აქტიურად მუშაობს ერთიანი პორტალის შექმნაზე, რომელშიც ერთიანდება სპორტის სფეროში არსებული სტატისტიკური ინფორმაცია და სხვა მრავალი სასარგებლო დოკუმენტი. აღნიშნული პორტალი წარმოადგენს ოფიციალურ წყაროს, სადაც ხელმისაწვდომია ინფორმაცია როგორც ქართველ სპორტსმენთა სპორტული შედეგების და მიღწევების, ასევე სპორტული ობიექტების, მოყვარულ და პროფესიონალ სპორტსმენთა რაოდენობის, სპორტული ორგანიზაციებისა და სპორტული ღონისძიებების შესახებ.

საიტზე ასევე განთავსებულია სპორტის სფეროში განხორციელებული კვლევები და სამინისტროს მიერ შემუშავებული სხვადასხვა სტრატეგიული მნიშვნელობის დოკუმენტები. პორტალზე თავმოყრილია ინფორმაცია სპორტული ინფრასტრუქტურის შესახებ ელექტრონული რუქის ფორმით, სადაც მონაცემების შენახვა და დამუშავება მიმდინარეობს „GIS” პროგრამაში, რომელიც უზრუნველყოფს გეოსივრცითი მონაცემების წერტილოვანი სიზუსტით ელექტრონულ რუქაზე დატანას.