მოზაიკა

პოპულარული მედიკამენტი კიბოსგან დამცავი საშუალება აღმოჩნდა

ანტითრომბოზული და სისხლის შედედების პოპულარული საშუალება ,,ვარფარინი“ კიბოსგან დამცავი საშუალება აღმოჩნდა.

როგორც Daily Mail-ი წერს, კვლევებმა აჩვენა, რომ თუ შუახნის ადამიანი იღებს ვარფარინს, მას სამომავლოდ კიბოს განვითარების რისკი უმცირდება.

როგორც წესი, ვარფარინს უნიშნავენ გულის შეტევის ან ინსულტის გადატანის შემდეგ მათ, ვინც არარეგულარული გულისცემის ან ოპერაციის შედეგად თრომბის რისკის ქვეშაა.

ცოტა ხნის წინ ბერგენის უნივერსიტეტის მეცნიერებმა დაადგინეს, რომ აღნიშნულ პრეპარატს შეუძლია ნებისმიერი სახეობის კიბოს განვითარების რისკის შემცირება 16%-ით, განსაკუთრებით ეფექტიანი კი ის პროსტატის, ფილტვის და მკერდის კიბოს შემთხვევაში აღმოჩნდა.

სპეციალისტებმა ჯერჯერობით ვერ ახსნეს, რისი გავლენით ამცირებს ვარფარინი კიბოს რისკს. ისინი ფიქრობენ, რომ პრეპარატი აძლიერებს იმუნიტეტს და სიმსივნურ წარმონაქმნებს თავიდანვე არ აძლევს ზრდის საშუალებას.