ეკონომიკა

`ომეგა ჯგუფი` ისევ ლიდერია - ჯილდო ნაციონალურ ბიზნეს რეიტინგში სტაბილურად მოწინავე პოზიციაზე ყოფნისთვის

საქართველოს ნაციონალური ბიზნეს რეიტინგისა და შვეიცარიის სარეიტინგო ასოციაციის შეფასებით, საქართველოს ლიდერი კომპანიები გამოვლინდა. საუკეთესო 20 ორგანიზაციას შორის წარდგენილი იყო „ომეგა ჯგუფი“.

რიგით 43-ე დაჯილდოებაზე პირველად გაიცა სპეციალური ჯილდო „ფერმანენთ ლიდერ“. ეს ჯილდო ,,ომეგა ჯგუფმა„ წლების განმავლობაში სტაბილურად მოწინავე პოზიციაზე ყოფნის გამო მიიღო. დაჯილდოების ცერემონიაზე ნომინაციაში დარგის ლიდერი გამარჯვებულად კომპანია „ოჯთ“ ( „ომეგა ჯგუფის თამბაქო“) და მის დამფუძნებელი ზაზა ოქუაშვილი დაასახელეს.

როგორც ,,ომეგა ჯგუფში“ შემავალი კომპანიის, OGT-ს გენერალურმა დირექტორმა, ნიკოლოზ ასანიძემ განაცხადა, აღნიშნული ჯილდო არის კომპანიის მიერ გასული 5 წლის მანძილზე გაწეული შრომის აღიარება.

,,ეს არის ძალიან მნიშვნელოვანი ჯილდო. ეს არის დიდი აღიარება ჩვენი კომპანიის მუხლჩაუხრელი შრომის, გასული 5 წლის მანძილზე. ეს არის ლიდერობა 5 წლის მაჩველებლებით ეკონომიკურ სფეროში. რა თქმა უნდა, ეს ჯილდო ძალიან ბევრს გვავალებს.

დაფუძნებიდანვე კომპანია ორიენტირებულია ახალი ტექნოლოგიების, მოწინავე გამოცდილების, საერთაშორისო სტანდარტების დანერგვაზე და ასევე უმაღლესი ხარისხის უზრუნველყოფაზე. რა თქმა უნდა, ეს ჯილდო კიდევ უფრო მეტს გვავალებს ახლა“, - განაცხადა OGT-ს გენერალურმა დირექტორმა, ნიკოლოზ ასანიძემ.

ჯილდოს მნიშვნელობაზე ისაუბრა ,,ომეგა 2“-ის გენერალურმა დირექტორმა, გიორგი ქურდაძემაც.

,,ძალიან სასიხარულოა, რომ დღესაც კიდევ ერთხელ დადასტურდა ამ კომპანიის მნიშვნელობა საქართველოსათვის, თითოეული ჩვენგანისთვის, ეკონომიკისთვის. მომავალშიც ეს ტენდენცია გაგრძელდება და კიდევ უფრო მეტი და მეტი წარმატება ექნება ამ კომპანიას, როგორც საქართველოში ისე, საქართველოს ფარგლებს გარეთ“, - განაცხადა გიორგი ქურდაძემ.

საქართველოს ნაციონალური ბიზნეს-რეიტინგის ხელმძღვანელის, მაკა კუტუბიძის განმარტებით, დაჯილდოების ცერემონიაში მონაწილეობას იღებდნენ კომპანიები, რომლებიც ყოველთვის ხვდებიან მათ ბიზნეს რეიტინგებში.

,,მიზანი არის ის, რომ გამოვარჩიოთ ის კომპანიები, რომლებიც არიან წარმატებულები და უფრო მაღალ დონეზე ავიყვანოთ ამ კომპანიების ხელშეწყობა საერთაშორისო ბაზარზე“, - განაცხადა მაკა კუტუბიძემ.

დაჯილდოებას ბიზნეს სექტორისა და ხელისუფლების წარმომადგენლები ესწრებოდნენ.