რეგიონები

„ნაციონალური მოძრაობის“ 4-კაციანი ფრაქცია პატარა ოთახშიც მოთავსდება - ბათუმის საკრებულოს თავმჯდომარე

ბათუმის საკრებულოში „ნაციონალური მოძრაობის“ ფრაქციის თავმჯდომარისა და საკრებულოს თავმჯდომარეს შორის სიტყვიერი შელაპარაკება მოხდა.

ამის მიზეზი გახდა ის, რომ „ნაციონალური მოძრაობის“ ფრაქციის წევრებს საკრებულოში თავიანთი ოთახი დაკეტილი დახვდათ, კარებზე კი, ფრაქცია „ქართული ოცნების“ თავმჯდომარის აბრა.

ოპოზიციური პარტიის წევრებმა პოლიცია გამოიძახეს.

ურთიერთშელაპარაკების დროს ფრაქცია „ნაციონალური მოძრაობის“ თავმჯდომარე მირდატ ქამადაძემ, საკრებულოს თავმჯდომარეს სულიკო თებიძეს კითხვით მიმართა „მხოლოდ “ქართული ოცნების“ თავმჯდომარე ხარ, თუ მათ შორის ჩემიც? გუშინ როდესაც განაცხადეთ, რომ ყველასთან თანამშრომლობას აპირებთ, მათ შორის ოპოზიციასთან, ეს არის თანამშრომლობის ფორმა, ასე იწყებთ თქვენ თანამშრომლობას?“.

საკრებულოს თავმჯდომარის სულიკო თებიძის განმარტებით, „ქართული ოცნების“ ფრაქციაში 19 დეპუტატია და ისინი ძველ კაბინეტში ვერ ეტევიან, შესაბამისად, მოხდა ოთახების გაცვლა.

„ქართული ოცნება- დემოკრატიული საქართველოს“ ოთახში მაქსიმუმ 5-6 ადამიანი თუ განლაგდებოდა, ხოლო „ნაციონალურ მოძრაობას“ ქონდა ოთახი სადაც თავისუფლად შეიძლება განლაგება 20-25 ადამიანის. ამდენად, რადგან უმრავლესობით მოვიდა „ქართული ოცნება“, ფრაქციაში 19 დეპუტატით, შეუძლებელი იყო პატარა ოთახში მოთავსება და პირიქით, რადგან „ერთიანი ნაციონალური მოძრაობა“ მოვიდა 4 ადამიანით, სავსებით საკმარისია მათთვის, ის პატარა ოთახი“,-განმარტა თებიძემ.

მირდატ ქამადაძის თქმით, კი „ნაციონალური მოძრაობა“ კაბინეტებისთვის არ მოსულა, ამიტომ მოქალაქეებს მისაღებში მიიღებს.

„ჩვენ კაბინეტებისთვის არ გვიბრძოლია. კაბინეტისთის ვინც იბრძვის ფაქტი აგერ არის. პირველივე დღეს მთავარ პრობლემად, ბათუმის საკრებულოს თავმჯდომარემ დაასახელა კაბინეტები. ახლა ვნახოთ, ამას მოსახლეობა დაინახავს, ჩვენ სამდივნოში, მისაღებში გადავინაცვლებთ, მოქალქეებს იქ შევხდებით და ვიმუშავებთ. ჩვენ ხალხმა იმიტომ აგვირჩია, რომ ბათუმელებისთვის საქმე გავაკეთოთ და არა კაბინეტებისთვის“,-აღნიშნა მირდატ ქამადაძემ.

მონიკა დავლიანიძე