მოზაიკა

მეცნიერები ფეხბურთსა და დემენციას შორის შესაძლო კავშირი გამოავლინეს

ბრიტანელი მეცნიერების კვლევის თანახმად, ის ფეხბურთელები, რომლებიც რეგულარულად თავით ურტყამენ ბურთს, დემენციის განვითარების მაღალი რისკის ქვეშ დგებიან. აღნიშნული კვლევა სამეცნიერო ჟურნალ Acta Neuropathologica-ში გამოქვეყნდა.

კარდიფისა და ლონდონის საუნივერსიტეტო კოლიჯების სპეციალისტები დიდი ხნის განმავლობაში სწავლობდნენ 6 გარდაცვლილი ფეხბურთელის ტვინს. აუტოფსიის შედეგად დადგინდა, რომ 4 მათგანი ქრონიკული ტრავმატული ენცეფალოპათიით იტანჯებოდა, ხოლო 6-ვეს ალცჰაიმერის დაავადების ნიშნები გამოუვლინდა.

ანგარიშის თანახმად, ეს მამაკაცები ფეხბურთს თამაშობდნენ საშუალოდ 26 წლის განმავლობაში, ხოლო 60 წლის შემდეგ მათ დემენცია განუვითარდათ.

ნევროლოგიის ლონდონის საუნივერსიტეტო კოლეჯის პროფესორ ჰიუ მორისის განცხადებით, ფეხბურთელებში ტვინის ტრავმის მიზეზი უფრო ხშირად ხდება სხვა ფეხბურთელთან შეჯახება ვიდრე ბურთთან თავით შეხება.

ბრიტანეთის საფეხბურთო ასოციაციის სამედიცინო საბჭოს ხელმძღვანელის ექიმ შარლოტა ქოუვის თქმით, ამ კვლევის შედეგები დაეხმარება სამედიცინო პერსონალს უფრო სიღრმისეულად შეისწავლოს ფეხბურთელთა დაზიანებები თავის არეში.

მეცნიერების თქმით, ფეხბურთის შიგადაშიგ თამაშის მოყვარულები ამ რისკის ზონაში არ ხვდებიან.

ანა მებურიშვილი