რეგიონები

მესტიაში ერთდროულად სამი მდინარე ადიდდა

მესტიაში ერთოდრულად სამი მდინარე -კოლხურა, დოლურა და მესტიაჭალა ადიდდა. ამის მიზეზი, გადაუღებელი წვიმა და შემდეგ სეტყვა გახდა, რომელიც მესტიას გვიან ღამით დაატყდა.

როგორც ჟურნალისტებს მესტიის გამგებელმა კახა ჟორჟოლიანმა განუცხადა, სტიქიის შედეგად ბეცოს ცენტრში ხიდია წაღებული, სოფელი ცემი კი გარესამყაროს თითქმის მთლიანად არის მოწყვეტილი, უშგულის გზაზე კი ღელეები გადმოვიდა.

გამგებლის თქმით, ადგილზე ელოდებიან სპეციალურ ტექნიკას, რომ მოხდეს მდინარეებისთვის კალაპოტის შეცვლა და დროებითი მისასვლელი ხიდების აღდგენა.

„არამარტო მესტიაში, ბეჩოს ცენტრში ორი ხიდია წაღებული, ამოსულია დიდი რაოდენობით წყალი. მდინარე მოსახლეობის ყანებამდე და მინდვრებამდეა მისული. მობილიზებულია ტექნიკა. მუშაობს, როგორც ბეჩოში, ისე მულახში. მძიმე ტექნიკით ვამუშავებთ მდინარეს, გადავუკეთეთ მდინარეს კალაპოტი. ერთი მძიმე ადგილი გვრჩება, ეს არის ჭოლაში სოფელი ცემი,სადაც მდინარემ შეუტია და მოწყვიტა სოფელი მთლიანად გარესამყაროს. ველოდებით ტექნიკას, რომ მდინარეს კალაპოტი შევუცვალოთ და დროებითი მისასვლელი ხიდები აღვადგინოთ“,-აღნიშნა გამგებელმა.

მონიკა დავლიანიძე