რეგიონები

მე ვიმოქმედებ ისე, როგორც დასჭირდება ბორჯომს - ბორჯომის საკრებულოს თავმჯდომარე

დღეს, 17 საათზე ბორჯომში საკრებულოს ფრაქცია „ქართული ოცნება“ აქციას გამართავს საკრებულოს თავმჯდომარის, ზაზა ჩაჩანიძის გადადგომის მოთხოვნით. თვითონ ჩაჩანიძემ ამაზე განაცხადა, რომ შეკრებას დაელოდება.

„მე დაველოდები აქციას, გავიგებ, კონკრეტულად თუ რას ითხოვენ. მათ უნდა დაასაბუთონ, რატომ მოითხოვენ ჩემს გადგომას. მე ბორჯომის მოსახლეობის მიერ ვარ არჩეული. მე ვიმოქმედებ ისე, როგორც დასჭირდება ბორჯომს და არა ისე, როგორც უნდა ირაკლი კვირკველიას“, - განაცხადა ბორჯომის საკრებულოს თავმჯდომარემ.

ჩაჩანიძემ ასევე განაცხადა, რომ თუ გაირკვევა, რომ საკრებულომ გუშინდელ სხდომაზე მერიის თანამშრომლებისთვის ხელფასების მომატების საკითხი წესების დარღვევით დაამტკიცა, ის ამ გადაწყვეტილებას ხელს არ მოაწერს.

გუშინ ბორჯომის საკრებულოში რამდენჯერმე მოხდა სიტყვიერი და ფიზიკური დაპირისპირება. უნდა განხილულიყო ბორჯომის მერიის თანამშრომლების ხელფასების მატების საკითხი. თავდაპირველად საკითხი ჩავარდა, რადგან 26 დეპუტატიდან მას მხარი დაუჭირა მხოლოდ 11-მა „ქართული ოცნების“ დეპუტატმა, ხოლო 15-მა ოპოზიციონერმა საკრებულოს წევრმა არა. სწორედ ამან გამოიწვია დაპირისპირება, თუმცა საბოლოოდ ხელფასების საკითხი დამტკიცდა.

დღეს დილიდან კი ბორჯომის საკრებულოსთან მობილიზებულია პოლიცია, რომელმაც შენობაში არ შეიშვა საკრებულოს თავმჯდომარე და ოპოზიციონერი დეპუტატები.

ანა მებურიშვილი