რეგიონები

მარნეულში დაჭრილთა ოჯახის წევრების ინფორმაციით, პირი, რომელმაც ცეცხლი გახსნა, ავტომატით იყო შეიარაღებული

მარნეულში, სოფელ ყიზილაჯლოში გვიან ღამით, „ქართული ოცნების“ ოფისთან მომხდარი თავდასხმის შედეგად დაჭრილი ორი პირის ჯანმრთელობის მდგომარეობა კვლავ მძიმეა. ისინი რეანიმაციულ განყოფილებაში რჩებიან.

მარნეულის საავადმყოფოში დაჭრილების ოჯახის წევრები იმყოფებიან. მათი ინფორმაციით, თავდამსხმელი „ქართული ოცნების“ საარჩევნო შტაბში მყოფ არცერთ პირს არ დაუნახავს, შესაბამისად დაშავებულების ახლობლებისთვის უცნობია, როგორც თავდამსხმელის ვინაობა, ასევე მოტივი.

როგორც ისინი ყვებიან, პირი, რომელმაც ცეცხლი გახსნა, ავტომატით იყო შეიარაღებული.

,,პალატკა აქვთ, სადაც ესენი იმყოფებიან ოფისში. არავის დაუნახავს ჩრდილი, ღამე ყოფილა, 11: 00 საათი. შემოსულა ერთი ვიღაც და ესროლა ავტომატით. ინციდენტი არ ყოფილა. არავის არ უნახავს, მაგრამ ავტომატით იყო. იძახიან, რომ ერთი იყო. მიზეზი ჯერ არავინ იცის. დაპირისპირება არ ყოფილა,“ - განაცხადა ერთ-ერთი დაჭრილის ოჯახის წევრმა.

ნინო ექვთიმიშვილი