მოზაიკა

მანჰეტენის კინიფესტივალის ფინალში მოხვედრის გამო ქართული ფილმი „8 წუთი“ ავტომატურად „ოსკარზე“ მიიღებს მონაწილეობას

პირველად მანჰეტენის მოკლემეტრაჟიანი ფილმების ფესტივალის ისტორიაში 10 ფინალისტს შორის ქართული ფილმი „8 წუთი“ მოხვდა. საქართველოს გარდა, ფინალისტებს შორის არიან შემდეგი ქვეყნები: აშშ, იტალია, ესპანეთი, შვეიცარია, ლატვია, ახალი ზელანდია, დიდი ბრიტანეთი და სირია.

მოკლემეტრაჟიანი ფილმი „8 წუთი“ გიორგი გოგიჩაიშვილისა და დათო აბრამიშვილის ერთობლივი ფილმია, რომელშიც მთავარ როლებს ანი ბებია, გიორგი შარვაშიძე და სლავა ნათენაძე თამაშობენ. აქედან სლავა ნათენაძე ნომინირებულია მამაკაცის საუკეთესო როლის შემსრულებლის კატეგორიაში. ფილმი აპოკალიფსურ ამბავს მოგვითხრობს მზის ჩაქრობის შესახებ. ზუსტად 8 წუთია საჭირო, რათა დედამიწამდე მზის სხივმა მიაღწიოს. თბილისში, როგორც მთელ მსოფლიოში, ხალხი პანიკაშია ჩავარდნილი, ხოლო ფილმი მათი ცხოვრების უკანასკნელ 8 წუთს ასახავს.

გარდა იმისა, რომ ფილმს ერთი კვირის განმავლობაში 100 000 კინომოყვარული ნახავს, „8 წუთი“ მანჰეტენის კინოფესტივალის ფინალში მოხვედრის გამო ავტომატურად მიიღებს 2018 წლის ოსკარებზე მონაწილეობის უფლებას. გარდა ამისა, ოსკარების დაჯილდოების ცერემონიალამდე ერთი კვირის განმავლობაში 8 წუთს უჩვენებენ ლოს-ანჯელესში, დახურულ ჩვენებებზე. მის მაყურებლებს შორის კი ჰოლივუდის ცნობილი სახეები იქნებიან.

მანჰეტენის მე-19 საერთაშორისო ფესტივალი 28 სექტემბრიდან 8 ოქტომბრამდე გაიმართება. საუკეთესო ფილმს 6 კონტინენტზე, 250 ქალაქის კინოთეატრებში გაუშვებენ.

ანა მებურიშვილი