რეგიონები

კურორტ “გოდერძიზე” მიღებული ტრავმის შედეგად აჭარის ფინანსთა მინისტრის ყოფილი მოადგილე გარდაიცვალა

კურორტ “გოდერძიზე” მიღებული ტრავმის შედეგად აჭარის ფინანსთა მინისტრის ყოფილი მოადგილე, თემურ გაბაიძე გარდაიცვალა.

როგორც ირკვევა, კურორტზე ყოფნისას თემურ გაბაიძე ფეხსაცმლის ზონარს იკრავდა, როდესაც სხვამ თხილამურებით გადაუარა. თემურ გაბაიძემ ქალა-ტვინის დაზიანება მიიღო.

გაბაიძის გარდაცვალებასთან დაკავშირებით აჭარის ფინანსთა და ეკონომიკის სამინისტრო განცხადებას ავრცელებს.

,,აჭარის ფინანსთა და ეკონომიკის სამინისტრო უდიდეს მწუხარებას გამოთქვამს კურორტ „გოდერძზე“ მომხდარ ფაქტთან დაკავშირებით. სამინისტრო თანადგომას უცხადებს გარდაცვლილის ოჯახის წევრებს, ნათესავებს და მეგობრებს ამ უმძიმესი ტრაგედიის გამო. ტრაგიკულად დაღუპული პიროვნება აჭარის ფინანსთა და ეკონომიკის სამინისტროს ყოფილი თანამშრომელია, შესაბამისად უწყების თითოეული თანამშრომლისთვის მომხდარი ფაქტი განსაკუთრებით მძიმეა. ფაქტზე უკვე აღძრულია სისხლის სამართლის საქმე 116-ე მუხლით, მიმდინარეობს გამოძიება.

რაც შეეხება უსაფრთხოების ნორმებს კურორტ „გოდერძზე“: კურორტზე მოქმედებს პირველადი სამედიცინო დახმარების პუნქტი, სქი პატრული და საზოგადოებრივ წესრიგს შსს აჭარის ა.რ პოლიციის დეპარტამენტის ხულოს რაიონის სამმართველოს ჯგუფი იცავს. სათხილამურო ტრასების ტერიტორიაზე განთავსებულია გამაფრთხილებელი ნიშნები, დამცავი ბადეები, სათხილამურო ტრასების კონტურის აღმნიშვნელი ალმები. თუმცა კიდევ ერთხელ გვინდა აღვნიშნოთ, რომ მოხმდარი საზარელი ტრაგედიაა და კიდევ ერთელ მწუხარებას გამოვხატავთ მომხდარ ფაქტთან დაკავშირებით’’, - ნათქვამია განცხადებაში.

ნინო ექვთიმიშვილი