რეგიონები

ყიზილაჯლოში აჰმედ იმამკულიევი და მამუკა მდინარაძე ერთმანეთს სიტყვიერად დაუპირისპირდნენ

მარნეულის სოფელ ყიზილაჯლოში, სადაც#48 საარჩევნო უბანზე განმეორებითი კენჭისყრა ტარდება, ინციდენტი მოხდა.

ერთმანეთს სიტყვიერად მარნეულში ნაციონალური მოძრაობის მაჟორიტარობის კანდიდატი, აჰმედ იმამკულიევი და ,,ქართული ოცნების’’ წევრი მამუკა მდინარაძე დაუპირისპირდნენ.

სიტყვიერი შელაპარაკება იმამკულიევის იმ განცხადებას მოყვა, რომლის თანახმადაც, პოლიციას ყიზილაჯლომდე ავტომანქანით მისასვლელი გზა გადაკეტილი აქვს და მოსახლეობას საარჩევნო უბნამდე ფეხით გადაადგილებისკენ მიუთითებს.

,,პოლიციის მანქანა იდგა აქ. როცა ჟურნალისტები მოვიდნენ აქ, პოლიციის მანქანა უცებ გაქრა. ზღუდავენ, რომ ადამიანი არ შემოვიდეს ამ ქუჩაზე. ეგენი ზღუდავენ მოსახლეობას გადაადგილებაში’’, - განაცხადა იმამკულიევმა.

თავის მხრივ, მამუკა მდინარაძემ აღნიშნა, რომ პოლიციელები მხოლოდ თავის სამუშაოს ასრულებენ და იმამკულიევს სთხოვა, პრობლემას ,,ნუ გამოიგონებს.’’

,,აქ პოლიცილეები მეც ყველგან დავინახე, თუმცა მათ დარეგულირების გარდა არაფერი გაუკეთებიათ. არეგულირებდნენ, მე რასაც შევხედე. როცა პრობლემა არ არის, ნუ მოვიგონებთ’’, - მიმართა მაჟორიტარობის კანდიდატს მამუკა მდინარაძემ.

,,ქართული ოცნების’’ წევრი აჰმედ იმამკულიევის მიერ გავრცელებულ ინფორმაციას ამომრჩევლის შეზღუდვასთან დაკავშირებით, ნაციონალური მოძრაობის მხრიდან აგორებულ ახალ პიარად აფასებს.

,,ახალი პიარი მოიგონეს რაღაც, როგორც ჩანს, იმიტომ, რომ არაფერი ცუდი არ ხდებოდა. ეს შედის ნაციონალური მოძრაობის ინტერესში და მოიგონეს ახალი პიარი’’, - განუცხადა ჟურნალისტებს მამუკა მდინარაძემ.

ნინო ექვთიმიშვილი