რეგიონები

იუსტიციის მინისტრმა დაბა ფასანაურში ორმოცდამეათე საზოგადოებრივი ცენტრი გახსნა

რეგიონებში საზოგადოებრივი ცენტრების მშენებლობა გრძელდება. იუსტიციის მინისტრმა თეა წულუკიანმა 50-ე საზოგადოებრივი ცენტრი ამჯერად საქართველოს მჭიდროდ დასახლებულ დაბა ფასანაურში გახსნა. საზეიმო ღონისძიებას მოწვეული სტუმრები, ადგილობრივი მოსახლეობა და ახლომდებარე სოფლების მცხოვრებნი ესწრებოდნენ.

საზოგადოებრივი ცენტრის გახსნა ფასანაურელებსა და დაბის სტუმრებს იუსტიციის მინისტრმა მიულოცა.

ფასანაურის საზოგადოებრივი ცენტრის ადგილზე თვითმმართველობის ძველი შენობა და სარეაბილიტაციო ბიბლიოთეკა იყო განთავსებული, სადაც წიგნები არასათანადო პირობებში ინახებოდა. ფასანაურის ახალგახსნილ საზოგადოებრივ ცენტრში უახლესი ტექნიკით აღჭურვილი ბიბლიოთეკა მოეწყო; აქ ელექტრონულ და ახალ წიგნებთან ერთად ძველი ბიბლიოთეკის ფონდიცაა დაცული.

საზოგადოებრივი ცენტრი საჯარო და კერძო სექტორის წარმატებული თანამშრომლობის საუკეთესო მაგალითია. საზოგადოებრივი ცენტრის გახსნით, ფასანაურელებისა და მიმდებარე სოფლის მცხოვრებთათვის ხელმისაწვდომი გახდა არა მხოლოდ საჯარო სერვისები, არამედ „მაგთისა“ და „ლიბერთი ბანკის“ მომსახურებაც, რაც პენსიონერებს − პენსიის დაბიდან გაუსვლელად მიღების, ახალგაზრდებს კი უკაბელო ინტერნეტით უფასოდ სარგებლობის საშუალებას მისცემს. მანამდე ფასანაურში არ არსებობდა არც ბანკის და არც მობილური ოპერატორის ოფისი.

დაბა ფასანაურში საზოგადოებრივი ცენტრის გახსნა კიდევ უფრო გაზრდის რაიონის ტურისტულ პოტენციალს, რომელიც დღესაც მაღალია. 24-საათიანი კავშირი სამყაროსთან მობილური ოპერატორის საშუალებით, ხელმისაწვდომი საბანკო მომსახურება, 24-საათიანი უკაბელო ინტერნეტი და უფასო სკაიპის ოთახი, ადგილობრივ მცხოვრებლებთან ერთად, ფასანაურის სტუმრებსაც მოემსახურება და ხელს შეუწყობს სამთო ტურიზმის კიდევ უფრო განვითარებას.

50-ე, საიუბილეო საზოგადოებრივი ცენტრის გახსნა სტუმრებისათვის ნამდვილ დღესასწაულად გადაიქცა. ფასანაურის ცენტრი სპეციალური ბანერითა და ჰელიუმის ბუშტებით მოირთო, გაკეთდა და მოეწყო საზოგადოებრივი ცენტრის ხეივანი და ქუჩის ლამპიონები, დაიდგა საზოგადოებრივი ცენტრების რელიეფური რუკა და ცენტრების მუშაობის ამსახველი სტატისტიკური მონაცემების საინფორმაციო დაფა. ღონისძიების ოფიციალური ნაწილის დასრულების შემდეგ გაიმართა საზეიმო კონცერტი.

ცენტრში ათამდე ადგილობრივი მცხოვრები დასაქმდა. ფასანაურის საზოგადოებრივი ცენტრი დაბაში მცხოვრებ 2000-მდე მომხმარებელს და მიმდებარე სოფლების (წინამხარის, უკანამხარის, დავითურნის, ვეშაგურნის, სოდევეს, მეჯილაურნის, ბანცურის, ცხვედიეთის, ხევშას, ჭიკანის, ჩირიკის, წინკობანის, ჩადისციხის, ზემო ამირნის, წიფორის) 741 კომლის მცხოვრებთ მოემსახურება.

საზოგადოებრივი ცენტრი საჯარო და კერძო სექტორის წარმატებული თანამშრომლობის საუკეთესო მაგალითია, რომელიც მნიშვნელოვნად ზოგავს ადგილობრივთა დროსა და ფინანსებს. სოფლისა და დაბების მოსახლეობას ის სახელმწიფო და კერძო სექტორის 200-ზე მეტ სერვისს სთავაზობს. იუსტიციის სამინისტროს საზოგადოებრივი ცენტრების მთავარი მახასიათებელი ადგილობრივთა საჭიროებებზე ორიენტაციაა. საზოგადოებრივი ცენტრები მომხმარებელს მრავალფეროვან სერვისს, გამარტივებულ პროცედურებს, საინფორმაციო ტექნოლოგიებთან წვდომასა და თანამედროვე ინფრასტრუქტურას სთავაზობენ. ფასანაურის საზოგადოებრივი ცენტრის გახსნით მოსახლეობისთვის ხელმისაწვდომი გახდა იუსტიციის სახლის სერვისების, სოფლის მეურნეობის სამინისტროს მომსახურებების, განათლებისა და მეცნიერების სამინისტროს სერვისების (მაგალითად, სასკოლო ატესტატის) ადგილზე მიღება. საზოგადოებრივი ცენტრის გახსნამდე მაღალმთიანი დასახლებიდან ადგილობრივ მოსახლეობას სახელმწიფო და კერძო სერვისებზე წვდომა უჭირდა. მათ ამისთვის დაბიდან რამდენიმე კილომეტრის დაშორებით დუშეთში უწევდათ ჩასვლა.

საქართველოს მასშტაბით ცენტრები ფუნქციონირებს რვა რეგიონსა და 35 მუნიციპალიტეტში. საქართველოს სხვადასხვა რეგიონში მოქმედ 50 საზოგადოებრივ ცენტრში ამ დრომდე 500 000-მდე სერვისი გაიცა, 2 000-მდე ღონისძიება ჩატარდა და 460 ადამიანი დასაქმდა.

ფასანაურის გარდა, დღეისათვის უკვე ფუნქციონირებს 49 საზოგადოებრივი ცენტრი ზეინდარში, შაშიანში, სართიჭალაში, გომში, რუისში, ჭალადიდში, ხევში, მანგლისში, კოდაში, ფოკაში, ნიგოითში, ჯვარში, შორაპანში, ყვარელწყალში, მუხაესტატეში, გეგუთში, მეჯვრისხევში, კაჭრეთში, ხიდისთავში, ნუკრიანში, კორბოულში, ღორეშაში, კაზრეთში, შილდაში, ორსანტიაში, ქვემო ნატანებში, კაბალში, ლენტეხში, ჩაქვში, ხრეითში, სადახლოში, რუხში, დიდ ჯიხაიშში, მარტყოფში, იორმუღანლოში, არხილოსკალოში, ტყვიავში, ვალეში, ბერძენაულში, უსახელოში, კიცხში, ლაჯანაში, ბარალეთში, კუმურდოში, წალკაში, კოხნარში, ბაკურიანში, თბილისსა (გლდანში) და მეორე სვირში.