ეკონომიკა

ისრაელური ინვესტიციით ბორჯომში სასტუმრო გაიხსნა

დღეს ბორჯომში ისრაელური ინვესტიციით აშენებული ფეშენებელური სასტუმრო „ფარადაიზ ბორჯომი“ გაიხსნა. მფლობელია საქართველო-ისრაელის ბიზნეს პალატის წევრი კომპანია „შავით ენდ როზენ“, რომელმაც სასტუმროში 5 მილიონი ლარის ინვესტიცია განახორციელა.

სასტუმროში, რომელიც ქალაქის ცენტრალურ პარკთან მდებარეობს, 24 ნომერია. ნომრები ადაპტირებულია 2, 4 და 6 ადამიანზე.

სასტუმრო სტუმრებს 15 აგვისტოდან მიიღებს. დღეს მის გახსნას მფლობელებთან - იცხაკ შავითთან და ბენი როზენთან ერთად, ისრაელიდან სტუმრები და საქართველო-ისრაელის ბიზნეს პალატის ხელმძღვანელი იციკ მოშე ესწრებოდნენ.

კომპანია „შავით ანდ როზენ“ კიდევ ერთი სასტუმროს აშენებას კვარიათში აპირებს. ამასთან, კომპანიას საქართველოში ისრაელიდან ყველწლიურად ათასზე მეტი ტურისტი შემოყავს.

საქართველო-ისრაელის ბიზნეს პალატის ხელმძღვანელის იციკ მოშეს განცხადებით, თუ იქნება ქართული და ისრაელის მხარეების აქტიურობა, შესაძლებელია, ინვესტიციების გაორმაგება. და რაც ყველაზე მნიშვნელოვანია, ხელისუფლებამ უნდა დაიცვას უცხოური ინვესტიციები განსაკუთრებით რეგიონებში, ვინაიდან პოტენციალიდან გამომდინარე, დიდია ინვესტიციის ახალი ნაკადების მოზიდვის შესაძლებლობები.