რეგიონები

გუდაურში ზამთრის სეზონი ოფიციალურად გაიხსნა

კურორტი გუდაური 30 წლისაა. სამთო-სათხილამურო კურორტზე ზამთრის სეზონი ოფიციალურად გაიხსნა და დაარსების თარიღი საზეიმოდ აღნიშნეს. ღონისძიებას საქართველოს პრემიერ-მინისტრი მამუკა ბახტაძე, ეკონომიკისა და მდგრადი განვითარების მინისტრი გიორგი ქობულია და სხვა ოფიციალური პირები დაესწრნენ.

ღონისძიება ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის და მთის კურორტების კომპანიის ორგანიზებით ახალ გუდაურში გაიმართა.

გიორგი ქობულიამ ყველას მიულოცა გუდაურის 30 წლის იუბილე და ახალი სეზონის გახსნა. „ვულოცავ ყველას გუდაურის 30 წლისთავს, დღეს გავხსენით ახალი სეზონი, გუდაური არის აბსოლუტურად განახლებული, ძალიან გაძლიერებული გვაქვს ჩვენი საბაგიროების გამტარუნარიანობა, ასევე ძალიან განვითარდა ინფრასტრუქტურა და ვიმედოვნებ, რომ წელს ჩვენი მოსახლეობაც და ტურისტებიც ბევრად უფრო ისიამოვნობენ გუდაურში ამ სეზონით“, - აღნიშნა ეკონომიკისა და მდგრადი გავითარების მინისტრმა.

გუდაური წლევანდელ სეზონს განახლებული ინფრასტრუქტურით ხვდება - კურორტზე 6 ახალი საბაგირო აშენდა, რეკონსტრუქცია ჩაუტარდა „ძველი კუდებისა“ და „საძელეს“ საბაგიროებს. ახალი საბაგიროების მშენებლობით კურორტზე 3.5-ჯერ გაიზრდება გამტარუნარიანობა. დამატებითი საბაგიროების მშენებლობასა და არსებულის რეკონსტრუქციის შემდეგ სასრიალო არეალი 20%-ით გაიზარდა. კურორტზე ასევე მიმდინარეობს, ხელოვნური გათოვლიანების სისტემის მე-2 ფაზის მშენებლობა.

გუდაურმა დაარსებიდან დღემდე მილიონობით ტურისტს უმასპინძლა, ამ ხნის მას აღმოსავლეთ ევროპის ზამთრის კურორტებში მოწინავე ადგილი უჭირავს.

ამასთან, საქართველოს რეგიონული განვითარებისა და ინფრასტრუქტურის სამინისტროს ხელმძღვანელობით, რამდენიმე მსხვილი პროექტი მიმდინარეობს. კობი-გუდაურის საბაგიროების მშენებლობა, რომელიც 7.5 მ. სიგრძისაა, კობი-გუდაურის საბაგირო გზის მშენებლობით, გუდაური-კობი -ყაზბეგი ერთ კლასტერად იქცევა. ახალი საბაგიროები „სოლიკო“ და „კუდები“ ღია "ბაბლის" ტიპის 6-ადგილიანი იქნება, რაც მგზავრის სიცივისაგან დაცვას უზრუნველყოფს, ხოლო საბაგირო „პირველი“ ღია, ასევე 6 ადგილიანი. საბაგირო ,,პირველის“ და "სოლიკოს“ გამტარუნარიანობა საათში 2800 მგზავრი, ახალი ,,კუდების“ კი 2200 მგზავრი იქნება.

ბოლო წლებში საქართველოში საგრძნობლად მოიმატა, როგორც ადგილობრივი, ისე საერთაშორისო ტურისტების რაოდენობამ. 2011/2012 - 2017/2018 წლებში ოთხივე სამთო-სათხილამურო კურორტზე (გუდაური, ბაკურიანი, გოდერძი, სვანეთი)ტურისტების რაოდენობა 491% -ით გაიზარდა.