რეგიონები

გორის მოსახლეობის ნაწილი დეკემბერში მისული გაზის გადასახადების გაპროტესტებას აგრძელებს

გორში ადგილობრივები ქალაქის ცენტრში მდებარე „სოკარ ჯორჯია გაზის“ ადმინისტრაციულ შენობასთან აქციას მართავენ. შეკრების მიზეზია დეკემბერში დარიცხული გაზის გადასახადებია, რომლებიც მოსახლეობის აზრით, ხელოვნურადაა გაზრდილი.

საინიციატივო ჯგუფმა ასევე 5 მოთხოვნა გააჟღერა.

დაიწყოს გამოძიება და იყოს გამოვლილი ყველა სამართლებრივი პროცესი. პრინციპულად მნიშვნელოვანია, რომ გამოძიება წარიმართოს არა ერთეული ადამიანების შემთხვევებით, არამედ, მან მიიღოს კოლექტიური გამოძიების სახე.

გაზის ხარისხის სტანდარტის მაკონტროლებელმა ორგანომ უნდა მიაწოდოს მოსახლეობას ინფორმაცია, რა კალორიულობისა და რამდენად ხარისხიანი გაზი მიეწოდებოდათ და მიეწოდებათ.

ადგილობრივმა ხელისუფლებამ უნდა ჩააბაროს ანგარიში და განუმარტოს მოსახლეობას, რას აკეთებენ, ვის მიმართეს, რა გზებს სთავაზობენ და ა.შ. აქციის მონაწილეთა თქმით, მათ სჭირდებათ ხელისუფოების გააზრებული, ქმედითი, დამხმარე ნაბიჯები და არა ემოციური საუბარი.

შეკრებილებმა მოუწოდეს სხვადასხვა პარტიის წარმომადგენლებს, პატივი სცენ სამოქალაქო პროტესტს და ნუ გამოვლენ პარტიული ინტერესებითა და ლოზუნგებით. მოთხოვნის მიხედვით, პროტესტი უნდა იყოს აბსოლუტურად თავისუფალი პარტიული შაბლონებისგან.

დადგინდეს, რამდენად სამართლიანად დაანგარიშდა გადასახადი, ხოლო მოსახლეობას აჩვენონ ამა წლის წინა თვეებისა და წინა წლების იგივე თვესთან შედარებული მონაცემები.

საინიციატივო ჯგუფმა ასევე მოითხოვა, რომ დავის დასრულებამდე არცერთ მოქალაქეს არ შეუწყდეს ბუნებრივი აირი.

ადგილობრივების ნაწილმა აქციები 30 დეკემბერს დაიწყო. პარასკევს ამ საქმის შესასწავლად გორში ჩავიდნენ ენერგოომბუდსმენი და სემეკის წევრები. მათ შეხვედრა გამართეს გორის მუნიციპალიტეტის მერიის, საკრებულოს წარმომადგენლებთან და „სოკარ ჯორჯია გაზთან“.