რეგიონები

გედევან ფოფხაძე ბორჯომის საკრებულოს ხელახალი არჩევნების ჩატარებას ემხრობა

ბორჯომის მაჟორიტარი დეპუტატი „ქართული ოცნებიდან“ გედევან ფოფხაძე ბორჯომის საკრებულოს ხელახალი არჩევნები ჩატარების მომხრეა.

დეპუტატი ბორჯომის საკრებულოში დღეს განვითარებულ პროცესებს გამოეხმაურა და აღნიშნა, რომ სამწუხაროდ, ბორჯომის საკრებულოში ფიზიკური დაპირისპირება ახალი არ არის და მსგავსი ფაქტები წინა მოწვევის საკრებულოშიც ხდებოდა.

ფოფხაძე „ქართული ოცნების“ მისამართით საბოტაჟსა და შანტაჟზეც საუბრობს.

„მსგავსი სამწუხარო ფაქტები წინა მოწვევის საკრებულოშიც ხდებოდა. ამ ყველაფრის ცენტრში გიუაშვილი იყო. წინა მოწვევის საკრებულოში, მოქმედმა თავმჯდომარემ ჩაჩანიძემ გიუაშვილის გალახვა დაგეგმა. ახლა ერთად არიან, რაც არსებული ფონის გათვალისწინებით ბუნებრივად მიმაჩნია, რადგან ადამიანები სხვა ფორმას ვერ ნახულობენ თუ არა, ფიზიკურ დაპირისპირებასა და შეურაცხყოფას.

“ლეიბორისტები” “პატრიოტთა ალიანსი” და “ნაციონალური მოძრაობა” ერთად ერთადერთი მიზნით დადგა, რომ “ქართულ ოცნებას” შანტაჟი და საბოტაჟი მოუწყოს, რათა ვერაფერი გავაკეთოთ. ეს რაიონსა და მოსახლეობას აზარალებს. შეიძლება სხვადასხვა გამოსავალი მოიძებნოს, მაგრამ შეიძლება ერთ-ერთი გამოსავალი ხელახალი, ახალი არჩევნების ჩატარება იყოს”, – განაცხადა ფოფხაძემ.

შეგახსნებთ, რომ, დღეს, ბორჯომის საკრებულოში "ქართული ოცნებისა" და ოპოზიციის დეპუტატები და მერიის წარმომადგენლები ერთმანეთს ფიზიკურად დაუპირისპირდნენ.

ადგილობრივი თვითმმართველობის არჩევნების შემდეგ ბორჯომის საკრებულო დღეს პირველად შეიკრიბა. არაერთი მცდელობის შემდეგ კვორუმი შედგა, თუმცა საკრებულომ ვერც დღეს მოახერხა ბორჯომის მერიის საშტატო ნუსხისა და გაზრდილი ხელფასების დამტკიცება.

თვითმმართველობის 125 თანამშრონელს წელს ხელფასი საერთოდ არ აუღია.