რეგიონები

ფოთის თეატრმა მუშაობა შეაჩერა

ფოთის ვალერიან გუნიას სახელობის პროფესიულ თეატრში სამუშაო პროცესი შეჩერებულია. თეატრის ადმინისტრაციის განმარტებით, ამის მიზეზია შენობაში არსებული მძიმე ვითარებაა, კერძოდ, რამდენიმე დღის წინ ჩამოვარდნილი ჭერი.

თეატრის დირექტორის, თენგიზ ხუხიას თქმით, მუშაობა იქამდე არ განახლდება, სანამ არ იქნება უზრუნველყოფილი თანამშრომელთა უსაფრთხოება.

,,მივიღეთ გადაწყვეტილება, დროებით შევაჩეროთ სამუშაო პროცესი, რათა დაცული იყოს ყველა ადამიანის უსაფრთხოება. რეალურად უამრავი პროექტი გვაქვს ჩაშვებული, რომლის გაჩერებას, რა თქმა უნდა, არ ვაპირებთ. თუმცა, ამ კონკრეტულ სიტუაციაში, სანამ კონკრეტული ნაბიჯები არ გადაიდგმება და ყველა ის პრობლემა, რომელიც ახლა ამ შენობაშია, არ მოგვარდება, ვერ მივიღებთ ვერც მაყურებელს და ვერ ჩავატარებთ ვერცერთ ღონისძიებას“, – აღნიშნა ხუხიამ.

ფოთის თეტრი 2014 წელს საზეიმო ვითარებაში გაიხსნა. შენობა ცხრა წლის განმავლობაში შენდებოდა, რისთვისაც ბიუჯეტიდან 11 მილიონ ლარზე მეტი დაიხარჯა.