რეგიონები

ფიზიკური დატვირთვის შემდეგ წყლის დიდი რაოდენობით მიღება მოსწავლეთა ინტოქსიკაციის მიზეზი ვერ გახდებოდა - ექიმი

ქუთაისის ინტერვენციული მედიცინის ცენტრის ბავშვთა გადაუდებელი დახმარების დეპარტამენტის მთავარი ექიმის, ნანა გიორგაძის განცხადებით, ფიზიკური დატვირთვის შემდეგ წყლის დიდი რაოდენობით მიღება მოსწავლეთა ინტოქსიკაციის მიზეზი ვერ გახდებოდა.

მისი თქმით, მოსწავლეებმა ონკანის წყალი მიიღეს, რის შემდეგაც გულისრევა და თავბრუსხვევა აღენიშნებოდათ.

„მოზარდები რჩებიან სამედიცინო ცენტრში და უტარდებათ შესაბამისი მკურნალობა, მათი ჯანმრთელობის მდგომარეობა სტაბილურია. მიმდინარეობს კვლევა მოწამვლის მიზეზების დასადგენად“, -განაცხადა ნანა გიორგაძემ.

ცნობისთვის, ქუთაისის 37-ე საჯარო სკოლიდან დღეს რამდენიმე მოსწავლე ინტოქსიკაციის ნიშნებით კლინიკაში გადაიყვანეს. გავრცელდა ინფორმაცია, რომ შესაძლოა, ამის მიზეზი გაზის გაჟონვა ან სასმელი წყალი ყოფილიყო. თუმცა როგორც სკოლის დირექტორმა, ნანა კენჭოშვილმა განაცხადა, სკოლა გაზის კომპანიამ შეამოწმა და დადასტურდა, რომ გაზის გაჟონვას ადგილი არ ჰქონია.