რეგიონები

„ეს ქვეყანა ჩალით არის დახურული“ - გოგი წულაია ქუთაისის საქალაქო სასამართლოში ჩალით მივიდა

„თავისუფალი საქართველოს“ იმერეთის ორგანიზაციის ხელმძღვანელი გოგი წულაია ქუთაისის საქალაქო სასამართლოსთან ჩალით მივიდა. „ქუთაისი პოსტის“ ინფორმაციით, ეს ქმედება წულაიამ განმარტა იმით, რომ „ეს ქვეყანა ჩალით არის დახურული“.

მან აღნიშნა, რომ ჩალის მოტანით აპროტესტებს ქართული სასამართლოების მიერ გამოტანილ უსამართლო გადაწყვეტილებებს. ამის მაგალითად წულაიამ მოიყვანა წყალტუბოს მუნიციპალიტის სოფელ ჟონეთში მცხოვრები მაყვალა დანგაძის შემთხვევა, რომელიც მეოთხე წელია აპროტესტებს, მის საკუთრებაში არსებული სასოფლიო-სამეურნეო დანიშნულების მიწაზე გრანიტის მოპოვებას.

წულაია სწორედ დანგაძესთან ერთად მივიდა სასამართლოში.

„ეს ქალბატონი ერთი არაა, ათობით, ათობით კი არა, ასობით ადამიანია, რომელიც სამართალს ვერ პოულობს წლების განმავლობაში, არიან რიგში და თუ მოუწევთ, მერე რა გადაწყვეტილებებს ღებულობს ეს მურუსიძის სახელობის ქუთაისის საქალაქო სასამართლო, ეს კიდე ცალკე თემაა. სიმბოლურად, ის რომ ეს ქვეყანა არის ასე ჩალით დახურული, მოვიტანეთ ჩალა და ყოველივე ამას ვაპროტესტებთ“, -განაცხადა წულაიამ.

დანგაძის თქმით, შპს „ანრე 2006“-მა და შპს „სვაია“-მ საკუთარი მიწა წაართვეს. მისივე მტკიცებით, კომპანიებს მთავრობა მფარველობს. დანგაძემ მოსამართლე მალხაზ ჩუბინიძესა და მთავრობას მოუწოდა, მისი კუთვნილი ტერიტორია დაუბრუნონ.