რეგიონები

ერთობლივი მუშაობით რთველი ორგანიზებულად ჩატარდება, ხარისხიანი ყურძენი შესაბამისად დაფასებული უნდა იყოს - დავით სონღულაშვილი

გარემოს დაცვისა და სოფლის მეურნეობის მინისტრი დავით სონღულაშვილი და ღვინის ეროვნული სააგენტოს თავმჯდომარე ლევან მეხუზლა ღვინისა და ალკოჰოლიანი სასმელების მწარმოებელი კომპანიების წარმომადგენლებს შეხვდნენ.

შეხვედრაზე მინისტრმა საქართველოში მეღვინეობა-მევენახეობის დარგის მნიშვნელობაზე, არსებულ მოცემულობაზე და პერსპექტივებზე ისაუბრა. მინისტრმა ყურადღება 2025 წლის რთველის ორგანიზებულად ჩატარების საკითხზე გაამახვილა.

„მოგეხსენებათ, ღვინო და ალკოჰოლიანი სასმელი ჩვენი ერთ-ერთი მთავარი საექსპორტო პროდუქტია. დღევანდელი მსოფლიო გამოწვევის ფონზე, როდესაც ღვინოზე მოთხოვნა მცირდება, უნდა გვქონდეს ადეკვატური რეაგირება. სწორედ ამიტომ, განსაკუთრებით მნიშვნელოვანია დარგის წარმომადგენლებთან შეხვედრა. საყურადღებოა ხარისხის გაუმჯობესება და კონტროლი, რადგან ქართული ღვინო მსოფლიო ბაზარზე კონკურენტუნარიანი იყოს. მწარმოებლების მიერ წამოყენებული საკითხები მაქსიმალურად იქნება გათვალისწინებული. მხოლოდ და მხოლოდ სამინისტროს, ღვინის ეროვნული სააგენტოს და მეღვინეების ერთობლივი მუშაობით შევძლებთ რთველის ორგანიზებულად ჩატარებას. თადარიგი თავიდანვე უნდა დავიჭიროთ, რომ ხარისხიანი ყურძენი იყოს შესაბამისად დაფასებული. ორგანიზების ნაწილში, სახელმწიფოს და კერძო სექტორის ერთობლივი ჩართულობა არის განსაკუთრებით მნიშვნელოვანი“, - განაცხადა დავით სონღულაშვილმა.

ღვინის ეროვნული სააგენტოს თავმჯდომარის, ლევან მეხუზლას განცხადებით, სახელმწიფოს წელს აქვს განსხვავებული მიდგომა და ხარისხიან და უხარისხო ყურძენს ერთ ფასად აღარ ჩაიბარებს.

„ქართული ღვინის წარმატებისთვის და საერთაშორისო ბაზრებზე დამკვიდრებისთვის აუცილებელია აქცენტი გაკეთდეს ხარისხზე. ღვინო იბადება ვენახში. ყურძნის ხარისხი ერთიორად მნიშვნელოვანია, როდესაც ქართულ ღვინოს წარვადგენთ საერთაშორისო ბაზრებზე; მნიშვნელოვანია ხარისხიანი ყურძნის დაფასება; შესაბამისად, წელს მაღალი და დაბალხარისხიან ყურძნის ფასი განსხვავებული იქნება“, - განაცხადა ლევან მეხუზლამ.

საუბარი შეეხო სიახლეს ­- 2025 წლის რთველის დროს მოსავლის აღრიცხვა ელექტრონული სასწორის მეშვეობით მოხდება. ყველა ის კომპანია, რომელიც მევენახეებისგან შეისყიდის ყურძენს, ვალდებულია იქონიოს ელექტრონული სასწორი, რომელიც ჩართული იქნება რთველის ერთიან ელექტრონულ ბაზაში. აღნიშნულ ბაზაში ავტომატურად აისახება კომპანიის მიერ შესყიდული ყურძნის რაოდენობა. ელექტრონული სასწორის გამოყენება მონაცემთა აღრიცხვას გაამარტივებს და მეტად დაზუსტებულს გახდის.

ღვინის ეროვნულ სააგენტოში გამართულ შეხვედრას ღვინის მწარმოებელი 50-მდე კომპანიის წარმომადგენელი ესწრებოდა.

ინფორმაციას გარემოს დაცვისა და სოფლის მეურნეობის სამინისტრო ავრცელებს.