მოზაიკა

ეროვნულ გალერეაში გოგი ალექსი-მესხიშვილის საიუბილეო გამოფენა გაიმართება

საქართველოს ეროვნული მუზეუმის დიმიტრი შევარდნაძის სახელობის ეროვნულ გალერეაში, 3 ნოემბერს, 18:00 საათზე გოგი ალექსი-მესხიშვილის საიუბილეო გამოფენის გახსნა გაიმართება.

ექსპოზიციაზე წარმოდგენილი იქნება არსისტის მიერ, 50 წლის განმავლობაში შექმნილი ნამუშევრები.

გამოფენა 2016 წლის 23 ნოემბრამდე გაგრძელდება.

შეგახსენებთ - გოგი ალექსი-მესხიშვილი იყო რუსთაველის სახელობის სახელმწიფო დრამატული თეატრისა და ზაქარია ფალიაშვილის სახელობის თბილისის ოპერისა და ბალეტის თეატრის მთავარი მხატვარი. 1996 წლიდან ამერიკის შეერთებულ შტატებში, ნიუ-ჰემფშირის შტატში დორტმუტის კოლეჯის თეატრალური სცენოგრაფიის კურსს უძღვება, რისთვისაც მიღებული აქვს ხელოვნების ფაკულტეტის საუკეთესო პედაგოგის ჯილდო.

გოგი ალექსი-მესხიშვილს შემოქმედებითი ცხოვრების მანძილზე მიღებული აქვს: საბჭოთა კავშირის სახელმწიფო პრემია (,,კავკასიური ცარცის წრე”, 1975წ.); სახალხო მხატვრის წოდება (1981წ.); იგი თბილისის საპატიო მოქალაქე, საქართველოს სახალხო მხატვარი და რუსეთის ხელოვნების აკადემიის საპატიო წევრია.

გოგი ალექსი-მესხიშვილის ნამუშევრები გამოფენილი იყო მსოფლიოს თეატრების წამყვან სცენებზე. მხატვრის ნამუშევრები დაცულია მსოფლიოს მრავალ გალერეასა თუ კერძო კოლექციაში.

მარი ნამგალაძე