რეგიონები

ენმ-ის აჭარის ოფისი ზურაბ პატარაძის პასუხისმგებლობის დაკისრების მოთხოვნით სასამართლოს მიმართავს

„ერთიანი ნაციონალური მოძრაობის“ აჭარის ოფისი აპირებს, სასამართლოს მიმართოს აჭარის მთავრობის თავმჯდომარის, ზურაბ პატარაძის პასუხისმგებლობის საკითხის დასაყენებლად.

ენმ-ის წევრის, რეზო ხარაზის განაცხადებით, აჭარის სახელმწიფო აუდიტის სამსახურმა დასკვნა გამოაქვეყნა, სადაც დაადგინა, რომ 2016 წელს აჭარის მთავრობის აპარატსა და ოთხ სამინისტროში პრემია-დანამატები არამიზნობრივად იყო გაცემული. უწყების დასკვნით, არ დადასტურდა მათი გაცემის რაიმე მატერიალური კანონიერება. პრემია-დანამატებს საპასუხისმგებლო სამუშაოს შესრულების დამადასტურებელი სახის მტკიცებულება არ აქვთ დართული.

რეზო ხარაზის ინფორმაციით, 2016 წელს აჭარის მთავრობასა და ოთხ სამინისტროში პრემია-დანამატების სახით დაახლოებით 2 მილიონ 800 ათას ლარამდე გაიცა.

„სახელმწიფო ბიუჯეტიდან პრემია-დანამატებისთვის მილიონობით ლარი გაიცა. ჩვენ ამის შესახებ არაერთხელ განვაცხადეთ და ახლა ჩვენი იურისტები საკითხზე მუშაობენ და სასამართლოს აუცილებლად მივმართავთ, რადგან შევაჩეროთ ეს პრაქტიკა. პასუხისმგებლობა უნდა დადგეს იმ პირების, რომლებმაც პრემია-დანამატების გაცემაზე ხელი მოაწერეს“,- განაცხადა ენმ-ის წევრმა ბრიფინგზე.