რეგიონები

ენმ ბათუმის მერიას კორუფციულ გარიგებაში ადანაშაულებს

„ერთიანი ნაციონალური მოძრაობის“ წევრმა ნოდარ დუმბაძემ ბათუმის მერია კორუფციულ გარიგებაში დაადანაშაულა. საქმე ეხება ანგისის სპორტული ბაზის ჩაბარების საკითხს.

როგორც დუმბაძემ აჭარის საზოგადოებრივ მაუწყებელს განუცხადა, ანგისის მიმდებარე ტერიტორიაზე ამ დრომდე მიმდინარეობს სამშენებლო სამუშაოები, თუმცა მერიას ჩაბარებული აქვს ობიექტი და კომპანიას 4 მილიონ 116 ათას170 ლარი გადაურიცხა.

დუმბაძის მტკიცებით, მშენებლობა ხარვეზებით მიმდინარეობს, რის გამოც ობიექტში ყოფნა უსაფრთხო არაა.

„სპორტული ბაზა სავარჯიშოდ არ არის უსაფრთხო, არსებობს ტრავმების მიღების მაღალი რისკი, მოუწესრიგებელია სადრენაჟო სისტემა და წვიმის დროს დგება წყალი, სამუშაოები არ წარმოებულა ხელშეკრულებით გათვალისწინებული და ბაზისთვის განსაზღვრული მასალის მიხედვით, მიუხედავად იმისა, რომ გაფორმდა მიღება ჩაბარების აქტი, სამუშაოები ბაზაზე ახლაც მიმდინარეობს, რაც იმას ნიშნავს, რომ მერიამ გადაიხადა წინასწარ თანხა სამუშაოების დასრულებამდე“, -თქვა ენმ-ის წევრმა.

მან ეჭვი გამოთქვა, რომ წინასწარ ფულის გადახდა კორუფციულ გარიგებასთან შეიძლება იყოს დაკავშირებული.

აღნიშნულ მშენებლობასთან დაკავშირებით დუმბაძემ უკვე შეიტანა საჩივარი აჭარის პროკურატურაში.
ბრალდებებს უპასუხეს ბათუმის მერიაში. უწყებამ პასუხი სოციალურ ქსელში გაავრცელა და ენმ სიცრუის გავრცელებაში დაადანაშაულა.

მერიის თქმით, ხელშეკრულებით ნაკისრი ვალდებულებები შესრულებულია.

„სპორტულ ბაზაზე პროექტითა და ხელშეკრულებით გათვალისწინებული ყველა სამუშაო შესრულებულია. ბაზის შენობა ჩაბარებულია ყველა საჭირო პროცედურის დაცვით და სამუშაოების შესრულების ხარისხიანობა დადასტურებულია სამხარაულის ექპერტიზის ბიუროს მიერ.

სპორტული ბაზის მოვლა-პატრონობას საფეხბურთო კლუბი ,,დინამო ბათუმი“ უზრუნველყოფს“, - ნათქვამია განცხადებაში.