რეგიონები

ძლიერმა წვიმამ ქობულეთში პრობლემები შექმნა

ძლიერი წვიმის შედეგად ქობულეთში რამდენიმე ქუჩაზე საცხოვრებელი სახლები დაიტბორა. მოსახლეობა ადგილობრივ ხელისუფლებას დახმარებას სთხოვს.

პრობლემები ადიდებული მდინარე აჭყვას კალაპოტიდან გადმოსვლას მოყვა. შედეგად ე.წ. ვილარის დასახლება დაიტბორა. წყალმა ცენტრალური გზა და საცხოვრებელი სახლების ეზოები დაფარა.

ადგილობრივები ამბობენ, რომ რამდენიმე წელია დატბორვის პრობლემა მათ ყოველი წვიმის დროს აწუხებთ.

მოსახლეობა აცხადებს, რომ სანიაღვრე არხები არ იწმინდება და სწორედ ეს ქმნის პრობლემას.

ქობულეთის გამგებლის, სულხან ევგენიძის ინფორმაციით, ამოტუმბვითი სამუშაოები დღეს დილიდან დაიწყო.

მისი თქმით, სოფელ ჩაისუბანსა და კვირიკეში, საცხოვრებელ სახლებთან მეწყერი დაფიქსირდა, თუმცა შემთხვევის შედეგად არავინ დაშავებულა.