რეგიონები

ჯიხაშკარსა და განმუხურში განმეორებითი კენჭისყრის პროცესი მშვიდ ვითარებაში მიმდინარეობს

სამეგრელოში, ზუგდიდის რაიონის ორ სოფელში, განმუხურსა და ჯიხაშკარის 3 საარჩევნო უბანზე განმეორებითი კენჭისყრის პროცესი ამ დროისათვის მშვიდ ვითარებაში მიმდინარეობს.

ამასთან, ჯიხაშკარისა და განმუხურის საარჩევნო უბნებზე ტექნიკური ხასიათის პრობლემები იყო, თუმცა ისინი მალევე აღმოიფხვრა.

ჯიხაშკარის 108-ე საარჩევნო უბნის კომისიის თავმდჯომარის ნიკა ჩალიგავას განცხადებით, უბანს მარკირებასთან დაკავშირებული პრობლემები შეექმნა.

„თავის დროზე გაიხსნა უბანი, როგორც წესი, ჩვეულებრივად. გარკვეული შეფერხება იყო მარკირებასთან დაკავშირებით , გაგვიფუჭდა, თუმცა დროულად მოგვიტანეს“,-აღნიშნა ჩალიგავამ.

ჯიხაშკარის 79-ე საარჩევნო უბნის კომისიის თავმჯდომარის ვლადიმერ მირცხულავას განცხადებით კი, უბანს მცირე დროით ელექტროენერეგიის პრობლემა შეექმნა.

„უბანი 7:00-ზე გავხსენით, ჩავატარეთ ყველა საჭირო პროცედურა. 8:20-ზე უკვე პირველი ამომრჩეველი მივიღეთ და ამჟამად ხმის მიცემის პროცედურა მშვიდ გარემოში მიმდინარეობს. ადგილზე უცხოელი დამკვირვებლებიც იმყოფებიან. ტექნიკური პრობლემა ამ დილით იყო, შუქი გამოირთო, მაგრამ ამას ჩვენთვის ხელი არ შეუშლია. ამ დროისთვის ყველაფერი მოგვარებულია“,-განაცხადა მირცხულავამ.

რაც შეეხება განმუხურის 38-ე საარჩევნო უბანს, კომისიის თავმჯდომარის ზანდა ყუფენიას განცხადებით, უბნის გახსნიდან ყველა პროცედურა კანონის დაცვით ჩატარდა.

„უბანი გაიხსნა 7:00-ზე, 8:15-ზე პირველი ამომრჩეველი დაფიქსირდა. ყველაფერი ყველა კანონის დაცვით, ყველა პროცედურის დაცვით ჩატარდა ყველა წილისყრა. კომისიის ყველა წევრი არის ადგილზე“,-აღნიშნა ყუფენიამ.

მონიკა დავლიანიძე