რეგიონები

დადგინდეს, რატომ აღმოჩნდა 4 წლის წინ აშენებული თეატრი ასეთ მდგომარეობაში - ფოთის თეატრის სამხატვრო ხელმძღვანელი პროკურატურას მიმართავს

ფოთის ვალერიან გუნიას სახელობის სახელმწიფო დრამატული თეატრის სამხატვრო ხელმძღვანელი დავით მღებრიშვილი პროკურატურას მიმართავს, რათა დადგინდეს, რატომ გახდა გასარემონტებელი 4 წლის წინ აშენებული ფოთის თეატრი.

„პრობლემებმა თეატრის შენობის გახსნისთანავე იჩინეს თავი და თეატრმა ამის შესახებ არაერთი წერილი მისწერა ფოთის მერიას, თუმცა, უშედეგოდ. 2018 წლამდე ჩვენს წერილებზე რეაგირება არ ხდებოდა. წელს, როგორც იქნა, კულტურის სამინისტროს აქტიური მხარდაჭერითა და ჩარევით, შენობის რეაბილიტაციის საქმე ნელა, მაგრამ დაიძრა მკვდარი წერტილიდან. ფოთის საკრებულომ გამონახა თანხა 30 000 (აცდაათი ათასი) ლარი. უნდა ჩატარდეს ტენდერი შენობის სამშენებლო-საინჟინრო ექსპერტიზაზე და სამუშაოების პროექტზე. შემდეგ კი უნდა გამოინახოს ფული შენობის კაპიტალურ რეაბილიტაციაზე. მაქვს შეკითხვა, ვინ არის პასუხისმგებელი შენობის ასეთ მდგომარეობაზე, რომლის ასაშენებლად 11 მილიონ ლარზე მეტი დაიხარჯა? მოვიდა დრო, როდესაც ყველაფერს თავისი სახელი უნდა დავარქვათ! დადგინდეს, თუ რატომ გახდა შესაძლებელი, რომ ახალი შენობა, დღეს ასეთ მდგომარეობაშია, მაშინ, როცა მშენებლობის დასრულებიდან მხოლოდ 4 წელიწადია გასული? შესაბამისი განცხადებით მივმართავ საქართველოს პროკურატურას”, - დაწერა მღებრიშვილმა სოციალურ ქსელში.

მიმდინარე წლის 6 თებერვალს, გვიან ღამით თეატრის ფოიეში ჭერის ნაწილი ჩამოინგრა. არავინ არ დაშავებულა. შენობის ავარიული მდგომარეობის გამო, თეატრი ვერ ფუნქციონირებს. დირექციის გადაწყვეტილებით, მუშაობა გაურკვეველი ვადით შეჩერდა.