რეგიონები

ბორჯომის ცენტრში მეუფე სერაფიმეს მხარდასაჭერი აქცია გაიმართა

ბორჯომში , ქალაქის ცენტრში 200-ზე მეტი ადამიანი შეიკრიბა ბორჯომ-ბაკურიანის ეპარქიის ყოფილი ეპისკოპოსის, მეუფე სერაფიმე ჯოჯუას მხარდასაჭერად. აქციის მონაწილეების თქმით, მეუფე სერაფიმეს ეპარქიიდან წასვლა “კონკრეტული პირების მიერ მასზე ჭორებისა და დეზინფორმაციის გავრცელების“ გამო მოხდა.

„დარწმუნებული ვარ, არც ერთ ბორჯომელს, ვინც მეუფე სერაფიმეს იცნობს, ეჭვი არ ეპარება მის ღვთისნიერებაში, მის სიკეთესა და პატიოსნებაში. მისი ამ ეპარქიიდან წასვლის კონკრეტულ მიზეზზე ვერაფერს ვიტყვი, თუმცა ფაქტია, რომ გარკვეულმა პირებმა ცრუ ინფორმაცია გაავრცელეს და ბინძური ჭორები ააგორეს”, - აცხადებს ბორჯომის მცხოვრები ნუნუკა მეზვრიშვილი.

მეუფე სერაფიმე ჯოჯუა ბორჯომ-ბაკურიანის ეპარქიის ეპისკოპოსი 2016 წლის აპრილიდან აღარ არის. საპატრიარქოს მიერ გავრცელებული ინფორმაციით, მიზეზად მისი პირადი თხოვნა დასახელდა.

2017 წლის 17 იანვარს გახდა ცნობილი, რომ მეუფე სერაფიმე გერმანიისა და ავსტრიის ეპარქიის მმართველად დაინიშნებოდა. ამ ფაქტს 3 სასულიერო პირის პროტესტი მოჰყვა. მათ მიერ ფეისბუქზე გამოქვეყნებულ წერილშია ნათქვამი, რომ მეუფე სერაფიმე მიუღებელია მათთვის, რადგან რამდენიმე თვის წინ ბორჯომისა და ბაკურიანის ეპარქიის სასწრაფოდ დატოვება მოუწია მრევლის მხრიდან უმძიმესი ბრალდებების გამო.

დღეს მეუფე სერაფიმემ თავის ფეისბუქზე დაწერა, რომ უარს ამბობს გერმანიასა და ავსტრიის ეპარქიაში გამგზავრებაზე.

ანა მებურიშვილი