რეგიონები

ბორჯომის მერმა მუნიციპალიტეტში შექმნილ ვითარებაში ბორჯომის საკრებულოს თავმჯდომარე დაადანაშაულა

ბორჯომის მუნიციპალიტეტის მერმა, ლევან ლიპარტიამ ბორჯომში შექმნილ კრიზისში ბორჯომის საკრებულოს თავმჯდომარე ზაზა ჩაჩანიძე დაადანაშაულა. მისი მტკიცებით, ჩაჩანიძისა და საკრებულოს რამდენიმე დეპუტატის ვიწროპარტიული ინტერესების გამო მერიის თანამშრომლები 3 თვეა, ხელფასს ვერ იღებენ.

ლიპარტიამ თქვა, რომ მზადაა, უარი თქვა საკუთარი ხელფასის გაზრდაზე.

„უკვე რამდენიმე თვეა ბორჯომის მუნიციპალიტეტში კონკრეტული ძალები ხელოვნურად ცდილობენ კრიზისის შექმნას. უკანასკნელი 3 თვის მანძილზე ბორჯომის მუნიციპალიტეტის თანამშრომლებს არ მიუღიათ კუთვნილი ანაზღაურება, რაც საკრებულოს თავმჯდომარის ზაზა ჩაჩანიძისა და მისი გავლენის ქვეშ მყოფი საკრებულოს წევრების დესტრუქციული ქმედებების შედეგია. მათი ვიწროპარტიული ინტერესების გამო თვეების განამვლობაში უხელფასოდაა დარჩენილი ასეულობით ადამიანი, რომელთა უკანაც ოჯახები დგანან.

მსგავსი დესტრუქციული სახის ქმედებები აფერხებს მუნიციპალური სამსახურების გამართულ საქმიანობას, ამის გამო კი მოსახლეობას შესაბამისი სერვისებით სარგებლობის საშუალება არ ეძლევა.

რიგ პოლიტიკურ ძალებს სურთ, რომ მოსახლეობა შეცდომაში შეიყვანონ, ისინი საუბრობენ, რომ თითქოს მე მსურს საკუთარი თანამდებობრივი სარგოს გაზრდა და სწორედ ამის გამოა ბორჯომში მსგავსი ვითარება შექმნილი.

მიუხედავად იმისა, რომ თანამდებობრივი სარგოს ზრდას კანონი ითვალისწინებს, როგორც მუნიციპალიტეტის დემოკრატიულად არჩეული მერი, მზად ვარ, უარი ვთქვა საკუთარი ანაზღაურებასთან დაკავშირებულ ცვლილებაზე.

მივმართავ საკრებულოს თავმჯდომარესა და მის მხარდამჭერებს, უარი თქვან დესტრუქციულ ქმედებებზე, გვერდზე გადადონ ვიწროპარტიული ინტერესები და მხარი დაუჭირონ მუნიციპალიტეტის სხვა თანამშრომლისთვის კანონით გათვალისწინებული თანამდებობრივი სარგოს ზრდას, საშულება მისცენ მერიის თანამშრომლებს, სრულყოფილად განახორციელონ მათზე დაკისრებული მოვალეობები და დაასრულონ ის დესტრუქციული ქმედებები, რომელსაც ადგილი აქვს უკანასკნელი დღეების და თვეების მანძილზე“, - წერია ბორჯომის მუნიციპალიტეტის მერის განცხადებაში.

გუშინ ბორჯომის საკრებულოში რამდენჯერმე მოხდა სიტყვიერი და ფიზიკური დაპირისპირება. უნდა განხილულიყო ბორჯომის მერიის თანამშრომლების ხელფასების მატების საკითხი. თავდაპირველად საკითხი ჩავარდა, რადგან 26 დეპუტატიდან მას მხარი დაუჭირა მხოლოდ 11-მა „ქართული ოცნების“ დეპუტატმა, ხოლო 15-მა ოპოზიციონერმა საკრებულოს წევრმა არა. სწორედ ამან გამოიწვია დაპირისპირება, თუმცა საბოლოოდ ხელფასების საკითხი დამტკიცდა.

დღეს დილიდან კი ბორჯომის საკრებულოსთან მობილიზებულია პოლიცია, რომელმაც შენობაში არ შეუშვა საკრებულოს თავმჯდომარე და ოპოზიციონერი დეპუტატები. მერიის თანამშრომლები მოითხოვენ ჩაჩანიძისგან, ხელი მოაწეროს საკრებულოს გუშინდელ გადაწყვეტილებას ხელფასების ზრდის შესახებ.

ანა მებურიშვილი