ეკონომიკა

ბოლნისის და მარნეულის მუნიციპალიტეტების გარდა, საქართველოს ტერიტორიაზე, კონკრეტულად შეზღუდული სფეროების გარდა, ეკონომიკური საქმიანობა გაგრძელდება - ნათია თურნავა

ეკონომიკის მინისტრმა კიდევ ერთხელ განმარტა, საგანგებო რეჟიმის პირობებში რა სახის ეკონომიკური საქმიანობა იზღუდება მთელი საქართველოს მასშტაბით. მისი თქმით, შეზღუდვას ექვემდებარება საცალო ვაჭრობა არასასურსათო საქონლით და ასევე სარესტორნე მომსახურება, რომელიც არ შეიძლება განხორციელდეს რესტორნებისა და კაფეების საკუთარ ფართში. მინისტრის განმარტებით, უფრო მკაცრი და განსხავებული რეგულაციები დაწესდა მხოლოდ ბოლნისისა და მარნეულის მუნიციპალიტეტებში, სადაც საგანგებო კარანტინის წესები მოქმედებს.

„გარდა ბოლნისის და მარნეულის მუნიციპალიტეტებისა, სადაც საგანგებო კარანტინია შემოღებული, დანარჩენი საქართველოს ტერიტორიაზე, ეკონომიკური საქმიანობა, კონკრეტულად შეზღუდული სფეროების გარდა, მთლიანობაში, ჩვეულ რეჟიმში, შეუფერხებლად ხორციელდება. კერძოდ, შეზღუდვას ექვემდებარება საცალო ვაჭრობა არასასურსათო საქონლით და სარესტორნე მომსახურება, რომელიც არ შეიძლება განხორციელდეს რესტორნებისა და კაფეების საკუთარ ფართში,“ - განაცხადა ნათია თურნავამ.

მინისტრმა კიდევ ერთხელ ხაზგასმით აღნიშნა, რომ არასასურსათო საქონლით ვაჭრობა, რომელიც დისტანციურად, ელექტრონულად და ადგილზე მიწოდებით, უსაფრთხოებისა და ეპიდემიოლოგების მიერ განსაზღვრული წესების დაცვით განხორციელდება, შეზღუდვას არ ექვემდებარება.