რეგიონები

ბათუმში, სადაც შემთხვევით აღმოჩენილი ქვევრი მუშამ გატეხა, სარეაბილიტაციო სამუშაოები შეჩერდა (video)

ბათუმში, თამარის დასახლებაში, სადაც შემთხვევით აღმოჩენილი ქვევრი მუშამ გატეხა, სარეაბილიტაციო სამუშაოები შეჩერდა.

ინფორმაცია ამის შესახებ ბათუმის მერიის კეთილმოწყობის სამსახურის უფროსმა თენგიზ პეტრიძემ მიაწოდა.

„სამუშაოები შეჩერდა და არ გაგრძელდება, ვიდრე არქეოლოგების მოსაზრებას არ მოვისმენთ, ამის შემდეგ გადაწყდება, გახდება თუ არა საჭირო სანქციების გატარება. ასეთი შემთხვევებისგან დაზღვეული არ ვართ, მაგრამ ამ შემთხვევაში დაუდევრობას ჰქონდა ადგილი“, – განაცხადა ბათუმის მერიის კეთილმოწყობის სამსახურის უფროსმა თენგიზ პეტრიძემ.

თავის მხრივ, როგორც თამარის დასახლებაში წყალგაყვანილობის სარეაბილიტაციო სამუშაოების შემსრულებელი კომპანიის ხელმძღვანელმა ალექსანდრე ბაღათურიამ განაცხადა, ,,მუშას ქვევრში განძი ეგონა, ამიტომ დაუყოვნებლივ გატეხა ისე, რომ არც ზედამხედველს აცნობა და არც მერიას.“

ცნობისათვის, ქვევრი მუშებმა, ე.წ. თამარის ციხიდან 300 მეტრში, ძმები ნობელების მუზეუმის მიმდებარე ტერიტორიაზე, 2 დღის წინ იპოვეს. სარეაბილიტაციო სამუშაოების დროს შემთხვევით აღმოჩენილი ქვევრი მუშამ ჯერ ხელით, შემდეგ ქვით და ბოლოს ტრაქტორის დახმარებით ჩამოამტვრია.შემთხვევის ამსახველი ვიდეომასალა სოციალურ ქსელში გავრცელდა.

ნინო ექვთიმიშვილი