რეგიონები

არის საშიშროება, რომ მდინარემ ისევ შეიცვალოს კალაპოტი - ჭუბერის თემის ტერიტორიული ორგანოს რწმუნებული

ჭუბერის თემის ტერიტორიული ორგანოს რწმუნებულის, ნინო ვიბლიანის განცხადებით, არის საფრთხე, რომ მდინარე ნენსკრამ კალაპოტი შეცვალოს.

მისივე ინფორმაციით, მოსახლეობა ევაკუირებულია და მას საფრთხე არ ემუქრება.

„ძირითადი საფრთხე მოხსნილია, მაგრამ არსებობს პატარ-პატარა რისკები იქიდან გამომდინარე, რომ წყლის ნაკადმა მორეცხა ნაპირები და არის საშიშროება, რომ მდინარემ ისევ შეიცვალოს კალაპოტი. მოსახლეობას საფრთხე არ ემუქრება. შემიძლია გითხრათ, რომ ხუთი მოქმედი ხიდი არის წაღებული. წყალმა ბოძებიც წაიღო. შესაბამისად, ჭუბერის ნახევარს ელექტროენერგია მიეწოდება, ხოლო წყლის მიღმა დარჩენილ სოფლებს ელექტროენერგია არ მიეწოდება“, - განაცხადა ვიბლიანმა.

ცნობისთვის, სოფელ ჭუბერში, სადაც ნენსკრაჰესს აშენებენ, სამაშველო სამუშაოები მთელი ღამის განმავლობაში მიმდინარეობდა. ჭუბერში გამემგზავრა საქართველოს პრემიერ-მინისტრი მამუკა ბახტაძე.

უხვი ნალექის გამო მთის დიდი ნაწილი ჩამოიშალა, რასაც მოჰყვა მდინარე ნენსკრას ადიდება. დატბორილია მიმდებარე ტერიტორია. სოფელი ჭუბერი და კიდევ რამდენიმე დასახლება გარესამყაროსაა მოწყვეტილი. ჩამოწოლილმა მეწყერმა და მოვარდნილმა ღვარცოფმა სოფლებთან დამაკავშირებელი ხიდები და რამდენიმე სახლი წაიღო.