რეგიონები

ახალციხის ინციდენტთან დაკავშირებით გამოძიება ძარცვის მუხლით დაიწყო

შინაგან საქმეთა მინისტრის მოადგილემ, შალვა ხუციშვილმა ჟურნალისტებთან განმარტება გააკეთა გუშინ ახალციხეში მომხდარ ინციდენტთან დაკავშირებით.

მისი თქმით, გამოძიება მიმდინარეობს 178-ე მუხლის პირველი ნაწილით, რაც გულისხმობს ძარცვას.

,,ყველას დაკითხვა მოხდება. მოგეხსენებათ, რომ წუხელ მისცა დაზარალებულმა ჩვენება. მინიმუმ გამოძიებამ უნდა დაადგინოს, ვინ დაიკითხება, შეატყობინოს როგორც წესია, ან მიიყვანოს და შესაბამისად, შემდეგ მოხდება მათი დაკითხვაც. მე რაც ვიცი, დღეს დილას ჯერ დაგეგმილი იყო შემთხვევის ადგილის დათვალიერება, რომ ენახათ, სად მოხდა, რა მოხდა და ადგილზე რაიმე კვალი არის თუ არა. ჩვენ განსაკუთრებულ ყურადღებას მივაქცევთ ამ გამოძიებას’’, - განაცხადა შალვა ხუციშვილმა.

ცნობისათვის: ნაციონალური მოძრაობის შტაბის წევრი, ნიკოლოზ ხიზაძე სამცხე-ჯავახეთის გუბერნატორს და მის თანმხლებ პირებს ფიზიკური შეურაცხყოფის მიყენებაში ადანაშაულებს. მისი ინფორმაციით, გუშინ სოფელ მუსხში ნაციონალური მოძრაობის მაჟორიტარი დეპუტატობის კანდიდატის წინასაარჩევნო შეხვედრის გადასაღებად მიდიოდა, რა დროსაც გუბერნატორის, აკაკი მაჭუტაძის მანქანით გზა გადაუღობეს, რის შემდეგაც მას ფიზიკურად გაუსწორდა ახალციხის კეთილმოწყობის სამსახურის ყოფილი უფროსი გია ბალიაშვილი, კამერა წაართვა და ტერიტორია გუბერნატორთან და სხვა პირებთან ერთად დატოვა.

ძარცვის ფაქტზე დაწყებული გამოძიების ფარგლებში ხიზაძე დახლოებით სამი საათის განმავლობში იკითხებოდა ახალციხის პოლიციაში.

ნინო ექვთიმიშვილი