რეგიონები

ადგილობრივები ფასანაურის გავლით რუსეთიდან სომხეთსა და ირანში ელექტროენერგიის გადამცემი ბოძების დამონტაჟებას აპროტესტებენ

ფასანაურში ადგილობრივი მოსახლეობა აქციას მართავს, რომლითაც ფასანაურის გავლით რუსეთიდან სომხეთსა და ირანში ელექტროენერგიის გადამცემი ბოძების დამონტაჟებას აპროტესტებენ. მოსახლეობა შიშობს, რომ ეს გარემოსთვის ზაინის მომტანი იქნება.

აქციის მონაწილეთა განცხადებით, მეზობელ სოფლებში ბოძების დამონტაჟება უკვე დაწყებულია და მათ სოფელში სამუშაოები 1 კვირაში დაიწყება.

ფასანაურის მოსახლეობა აპირებს, ხელი შეუშალონ მშენებლობას, რადგან, როგორც თვითონ ამტკიცებენ, სატრანზიტო მაგისტრალის შექმნის შემთხვევაში მთიულეთის ქედზე უნდა გადაიჭრას 30-50 მეტრის სიგანის ხეები, რასაც შეიძლება მეწყერი და ზვავი მოყვეს.

ადგილობრივები იმასაც ამბობენ, რომ გადამცემი ანძები ჯანმრთელობისთვის საზიანოა და ბოძების დამონტაჟებას სოფლის გვერდის ავლით და დაუსახლებელ ტერიტორიაზე გადატანას ითხოვენ.

აქციის მონაწილეებთან შესახვედრად ფასანაურში ჩავიდნენ კომპანია ,,ენერგოტრანსის’’ ტექნიკური დირექტორი, ჯემალ ახალაია და დუშეთის მუნიციპალიტეტის გამგებელი, ვაჟა ჩოხელი.

მათი განცხადებით, არსებობს გეოლოგიური დასკვნა, რომლის საფუძველზეც შეიძლება ითქვას, რომ აღნიშნული პროექტი მოსახლეობისთვის საფრთხეს არ წარმოადგენს.

,,ამ პროექტს ახლავს გეოლოგიური დასკვნა და მეწყერსაშიშ ტერიტორიაზე, რა თქმა უნდა, ეს არ გაკეთდება. ჩვენი პოზიციააა ის, რომ არც ტყე გაიჩეხოს, მაგრამ ეს პროექტი უნდა განხორციელდეს ისე, რომ მოსახლეობაც არ დაზარალდეს’’, - განაცხადა გამგებელმა.

ნინო ექვთიმიშვილი