რეგიონები

აჭარის უმაღლესი საბჭოს ჯანდაცვის კომიტეტმა გასვლითი შეხვედრა ხულოში გამართა

აჭარის უმაღლესი საბჭოს ჯანდაცვის კომიტეტმა გასვლითი შეხვედრა ხულოში გამართა.

შეხვედრაზე აჭარის ჯანდაცვის მინისტრმა, ზაალ მიქელაძემ სფეროში არსებული 2017 პროგრამები გააცნო საბჭოს წევრებს და სხვადასხვა მუნიციპალიტეტის ჯანდაცვის სფეროს წარმომადგენლებს.

მათ მოისმინეს მუნიციპალიტეტში არსებული პრობლემები და ადგილობრივებს მის მოგვარებას დაპირდნენ.

მინისტრმა ისაუბრა გამოწვევებზეც და აღნიშნა, რომ მთავარია მოხდეს მოსახლეობის ინფორმირება არსებული პროგრამების დაფინანსების თაობაზე.

,,ჯანდაცვის კომიტეტის სხდომა გაიმართა ხულოს მუნიციპალიტეტში და საკითხი იყო სწორედ ჯანდაცვის სამინისტროს 2016 წლის მუშაობის შეჯამება და დაგეგმილი პროგრამები 2017 წელს. ჩვენ დეტალურად გავაცანით ინფორმაცია და მთავარი პრინციპი იყო სწორედ ის, რომ დამსწრე რწმუნებულები, სოფლის წარმომადგენლები და ექიმები, ყოფილიყვნენ დეტალურად ინფორმირებულნი პროგრამის მიმდინარეობის შესახებ’’, - განაცხადა ზაალ მიქელაძემ.

თავის მხრივ, როგორც აჭარის უმაღლესი საბჭოს დეპუტატმა, ზაზა ოქუაშვილმა კომიტეტის სხდომის დასრულების შემდეგ აღნიშნა, ჯანდაცვის სფეროში გაუმჯობესების ერთ-ერთი მაჩვენებელია ის, რომ პროფილაქტიკური მიზნით მაღალტექნოლოგიური გამოკვლევების ჩატარება სოციალურად დაუცველი ფენისთვისაც კი, ხელმისაწვდომი გახდება.

მისი თქმით, გამოკვლევები დააზღვევს ადამიანს ჯანმრთელობასთან დაკავშირებული შემდგომი გართულებებისგან.

,,ეს იყო ნამდვილად გაუმჯობესებული წინა წლებთან შედარებით. გაუმჯობესების ერთ-ერთ დამახასიათებელს გამოვყოფდი იმას, რომ პროფილაქტიკური მიზნით რაც მიუღწევადი იყო ადრე სოციალურად დაუცველი ფენისთვის - უმაღლესი ტექნოლოგიური გამოკვლევების ჩატარება, უკვე იქნება მისაწვდომი.

ძალიან საინტერესო ფაქტორია, იმიტომ, რომ ეს დააზღვევს, ფაქტობრივად დაზღვევის პროცესს გაზრდის და პროფილაქტიკური იქნება იმიტომ, რომ არ განვითარდეს დაავადებები და არ მიიღოს შემდგომ ბევრ შემთხვევაში როგორც ხდება ხოლმე, ლეტალური შედეგები.

მთლიანობაში ხარჯიც შემცირდება, იმიტომ, რომ არ წავა გართულებისკენ’’, - განაცხადა ზაზა ოქუაშვილმა.

მისივე თქმით, მნიშვნელოვანია ჯანდაცვის კომიტეტის მსგავსი გასვლითი სხდომების ჩატარება და რაიონში ადგილზევე პრობლემების და შეთავაზებების მოსმენა.

,,ჯანდაცვის კომიტეტის მუშაობს ამაზე, ზრუნავს. ძალიან კარგია ასეთი გასვლითი სხდომა, რომ თვითონ რაიონში ხდება და ხდება განმარტება, ახსნა. მე მოვისმინე ბევრი გამგებლის მიერ, წარმომადგენლის მიერ პირობები, პრაქტიკული შემოთავაზებები და ყურადსაღები მოთხოვნები. ასე რომ მუშაობა მიდის. უნდა გავაკეთოთ მეტი, როგორც ჯანდაცვის კომიტეტმა’’, - განაცხადა ზაზა ოქუაშვილმა.

ნინო ექვთიმიშვილი