რეგიონები

აჭარის ფინანსთა და ეკონომიკის სამინისტრო ენმ-ს პასუხობს

აჭარის ავტონომიური რესპუბლიკის ფინანსთა და ეკონომიკის სამინისტროს წარმომადგენელი ”ნაციონალური მოძრაობის” წევრის, გავრცელებულ ინფორმაციას გამოეხმაურა.

როგორც აჭარის ფინანსთა და ეკონომიკის სამინისტროს სამართლებრივი უზრუნველყოფისა და სახელშეკრულებო მონიტორინგის დეპარტამენტის უფროსმა გელა ცინცაძემ განაცხადა, კომპანიას “ეიბიეს ფრივილიჯ ქლაბ რიზორთი” ბათუმში, ნინოშვილის ქუჩაზე მშენებლობის ნებართვა 2017 წლის ბოლომდე უნდა მიეღო.

მისივე ინფორმაციით, კომპანიას მშენებლობის ნებართვის მისაღებად 2018 წლის 1 ივნისამდე დამატებითი დრო მიეცა.

"კომპანიამ ხელშეკრულების თანახმად მერიაში პროექტი წარადგინა. მერიამ კომპანიას გარკვეული რეკომენდაციები მისცა, რომელთა შესრულება გარკვეულ დროს მოითხოვს. შესაბამისად, პროექტის გადაკეთება არის საჭირო. ამის გათვალისწინებით კომპანიამ დამატებითი დრო მოითხოვა და მას 2018 წლის 1 ივნისამდე დამატებითი დრო მიეცა მშენებლობის ნებართვის მისაღებად. ხელშეკრულება პირგასამტეხლოს ითვალისწინებდა და შესაბამისად 2017 წლის ბოლოდან ხელშეკრულებაში ცვლილებების შეტანამდე პირგასამტეხლო ერიცხებოდათ, თუმცა აჭარის ქონების, მართვის და განკარგვის კანონის შესაბამისად, აჭარის ფინანსთა და ეკონომიკის სამინისტროს აქვს უფლება მთავრობის გადაწყვეტულებით მიიღოს მსგავსო გადაწყვეტილება და ინვესტორი პირგასამტეხლოსგან გაათავისუფლოს, საინვესტიციო გარემოს ხელშეწყობის მიზნით.

ადგილზე 100- ნომრიანი სასტუმროს აშენება იგეგმება, სადაც 55 მილიონი ლარის ინვესტიცია უნდა განხორციელდეს",- აცხადებს გელა ცინცაძე.

ცნობისათვის, "ერთიანი ნაციონალური მოძრაობის" ბათუმის საკრებულოს დეპუტატის, მირდატ ქამადაძის ინფორმაციით, შპს “ეიბიეს ფრივილიჯ ქლაბ რიზორთი” ბათუმში, ნინოშვილის ქუჩაზე მშენებლობას უკანონოდ ახორციელებს.

როგორც ენმ-ს წევრმა პარტიის ოფისში გამართულ ბრიფინგზე განაცხადა, აჭარის ფინანსთა და ეკონომიკის სამინისტრომ 2017 წლის 19 დეკემბერს კომპანია პირგასამტეხლოსგან გაათავისუფლა, რომელმაც სახელშეკრულებო პირობები დაარღვია.