მოზაიკა

70 წლის ორსული პენსიონერი მსოფლიო რეკორდისთვის ემზადება

70 წლის მექსიკელი ქალი მარია დე ლა ლუზი ორსულობის მეექსვე თვეშია.

პენსიონერმა გამოცემა Daily Mail-ს ექოსკოპიის შედეგები აჩვენა.

,,მითხრეს, რომ გოგონას ველოდები“, - ამბობს გამოცემასთან საუბარში მარია.

როგორც ყველაზე ხანდაზმული მშობიარის წოდების პრეტენდენტი ამბობს, იმის შესახებ, რომ მე-8 შვილს ელოდებოდა, 3 თვის წინ გაიგო.

,,ფეხები მტკიოდა, თავბრუსხვევა მქონდა, ღებინება. 10-მდე კვლევა ჩამიტარდა როგორც სახელმწიფო ისე კერძო კლინიკებში. ექიმებს არ შეეძლოთ ამის დაჯერება“, - ამბობს 70 წლის მარია.

როგორც პენსიონერი ამბობს, მისი ზრდასრული შვილები სიხარულით არ შეხვედრიან ახალ ამბავს, რადგან ფიქრობენ, რომ დედა საკმაოდ ხანდაზმულია მშობიარობისთვის.

გინეკოლოგების თქმით, მარიას საკეისრო კვეთა უნდა ჩაუტარდეს.

იმ შემთხვევაში, თუ 70 წლის მექსიკელი წარმატებით იმშობიარებს, ის დაამყარებს მსოფლიო რეკორდს, რომელიც ამ დრომდე მარია დელ კარმენ ბოუსადა დე ლარას ეკუთვნოდა. ამ უკანასკნელს 2006 წელს 66 წლის ასაკში ტყუპი ბიჭები შეეძინა. თუმცა, აღსანიშნავია, რომ ის ხელოვნური განაყოფიერებით დაორსულდა.